Юртимизда

Янги йил кечаси

Кўнгил маъюс тортди йилнинг сўнгида,

Билмам, ниманг билан сеҳрладинг, қор.

Бугун куппа-кундуз кўзим ўнгида,

Яна бир ёшимни ўғирладинг, қор.

Қирқинчи қасримга ўтайми, энди,

Кечаги ёшлигим эртакми, энди?

Баҳорим етгудек, қўлим узатсам,

Етолмай дилимни не деб юпатсам.

Лайлакқор, азизим, ғалат байрам бу —

Кулиб кузатсамми, йиғлаб кузатсам.

Дардим жим ичимга ютайми, энди,

Кечаги ёшлигим эртакми, энди?

Сўрсанг, севинчимдан ўкинчим кўпроқ,

Сендан-да кумушроқ сочимдаги оқ.

Йилим келмай туриб, йилим кетмоқда,

Кўзда табассум-у, киприкда титроқ.

Мен ҳам сал шошдим-да, қайтайми энди,

Кечаги ёшлигим эртакми, энди?

Янги йил, келавер қандай келсанг ҳам,

Кимлар етди сенга, кимлар етмади.

Сен янги йўлдошсан, сен янги ҳамдам,

Йўқлаб келганингни ўзи бир байрам.

Қулоғингга бир гап айтайми, энди,

Кечаги ёшлигим эртакми, энди…

Муҳаммад ЮСУФ

Сиз ҳозир hordiq.uz сайтидасиз. Янгиликлардан ўртоқларингизни ҳам хабардор қилинг:

Добавить комментарий

Ваш e-mail не будет опубликован. Обязательные поля помечены *

семнадцать + пятнадцать =

Диққат! Диққат!
Диққат! Диққат!
Ўқишни тавсия этамиз