ЭЛЛИККА КИРГАНИМДА ҚАРИБ ҚОЛДИМ, ОНАЖОН…

0

(онам Чўлпоной Тешабой қизининг ёрғин хотирасига)

***

Онаси бор одамлар ҳеч қачон қаримаскан,

Кундек ёруғ юзлардан табассум аримаскан,

Соғинч онасизликка малҳам-у доримаскан,

Сароблар саҳросига бориб қолдим, онажон,

Элликка кирганимда қариб қолдим, онажон.

***

Сизсизликнинг ўтида кунда куявераман,

Сиз деб бўм-бўш бағримни нуқул суявераман,

Олисдаги қабрга қараб қўявераман,

Йўл бошида тош қотдим, хориб қолдим, онажон,

Элликка кирганимда қариб қолдим, онажон.

***

Нега менинг кулбамга капалаклар кирмайди,

Сенинг онангман дея менга қараб турмайди,

Сизсиз шикаста бағрим сира таскин бермайди.

Қисмат лойин минг қайта қориб толдим, онажон,

Элликка кирганимда қариб қолдим, онажон.

***

Татимайди кундузлар, зулматларни кўргим йўқ,

Сиз йўқ дунё пойида тиз чўкканча тургим йўқ,

Бўшаб қолган борлиққа бағримни ҳеч бергим йўқ,

Сароблар саҳросига бориб қолдим, онажон,

Эликка кирганимда қариб қолдим, онажон.

12.06.2017 йил 12-июн

Олимжон ҲАЙИТ

Сиз ҳозир hordiq.uz сайтидасиз. Янгиликлардан ўртоқларингизни ҳам хабардор қилинг:

ФИКР БИЛДИРИШ

Please enter your comment!
Please enter your name here