Ишани, Жассика, Жумонг: ўзбек чақалоқларга қўйилаётган «антиқа» исмлар

1

Самарқандда нашр этиладиган «Зарафшон» газетасида янги туғилган чақалоқларга «антиқа» исмлар қўйиш урфга киргани ҳақида мақола эълон қилинди.

Яқинда бир танишимизнинг келини қиз фарзандли бўлибди, дейилади мақолада. Чақалоққа узоқ умр тиларканмиз, унинг исми кўпчилик қатори менинг ҳам ҳайратимга сабаб бўлди. «Ишаниой!» деб эркалатди жажжи гўдакни онаси бағрига босиб. Ҳинд сериалининг қаҳрамонига ҳавас қилибди бу оила.

– Ўзимизда ҳам чиройли исмлар кўп-ку ахир? – кўнглимдагиларни яширолмадим.

– Келиним ҳомиладор пайти шунақа ният қилган экан, раъйини қайтармайлик, дедик-да, – жавоб берди онахон.

Албатта, исм қўйишдан тортиб оиладаги жуда кўп масалалар шахсий иш. Аммо кейинги пайтларда антиқа исм қўйишда ёш оилалар баҳсга киришиб кетгандай, назаримда. Амал, Имран, Амаля, Сафра – қанчалик кўп жарангласа, шунча яхши.

Бир куни таксида ўтирган ёш она қизалоғини «Жассика, жим ўтир!» дея койиди.

– Жассика, бу қизалоқнинг исми Жассиками? Унинг маъноси нима? – ажабланиб сўрадим.

– Жассика – машҳур Ҳолливуд юлдузи-ку, – дея менинг билимсизлигимдан озорлангандай жавоб берди она.

Дарвоқе, бундан анча йиллар аввал бир қўшнимиз ўғлининг исмини корейсларнинг сериалидан илҳомланиб, «Жумонг» деб қўйганди. Яқинда уни учратиб қолдим. Жумонгбек яхшими, деб сўраганимда «Болалар мазах қилавергач, исмини алмаштиришимизга тўғри келди», деб қолди.

Жумонгнинг онасига хавотир аралаш қараб турдим. Ишқилиб, ота-она бу сафар бошқа сериалдан таъсирланмабдимикан? Йўқ, ҳартугул улар фарзандига ўзбекона исмни муносиб  кўришибди.

Қизиқ, жажжи қизалоқ Ишани кейинчалик исмини тенгдошларига нима деб изоҳлар экан? Ахир, ушбу сериал ҳам бир кун унут бўлади-ку.

Сиз ҳозир hordiq.uz сайтидасиз. Янгиликлардан ўртоқларингизни ҳам хабардор қилинг:

1 ТА ФИКР

ФИКР БИЛДИРИШ

Please enter your comment!
Please enter your name here