«ХАЙ-ХАЙ ТВ». ЭРТАНГИ ТЕЛЕДАСТУРЛАР… (Иккинчи қисм)

0

 

04: 00 да: Ойпарастлар учун «Осмондаги ойимдан, томорқадаги лойимдан» кўрсатуви;

05: 00 да: Фарғона водийси нонвойлари фаолияти ҳақида ҳикоя қилувчи «Устоз-шогирд» туркумидан «Ўв, тандирни қизитмабсан-ку, қизиталоқ! Бир уриб чалпак қип қўяйми?» деб номланган телефильм эфирга узатилади;

06: 30 да: Кўп хотинли эркаклар учун «Император» кўрсатуви;

08: 00 дан 10: 00 гача танаффус;

10: 00 да: «Анжанча саломлашамиз» рукнидаги навбатдаги кўрсатув эфирга узатилади. «Икки дўст учрашуви»

«— Вей, минг йўл бўлди-ёв кўришмаганимизга!.. Қалайсан, ҳароми?..»

«— Яхшиман. Ўзинг-чи, ифлос?..»

Кўрсатув давомида худди шу саломлашишнинг саломатлик ва одамлар ўртасидаги меҳр-оқибатга таъсири хусусида сўз юритилади.

11: 00 да: Қашшоқ ва юрак касалига йўлиққанлар талабига кўра, «Эшиклар ёпилади, кейинги меҳмон газчилармиш» кўрсатувини томоша қиласиз;

12: 45 да: Жамият учун иллат ҳисобланмиш фоҳишабозликка қарши кураш доирасидаги «Тунги капалак — бу арвоҳ капалак» кўрсатуви;

13: 45 дан 18: 00 гача профилактика;

18: 00 да: Ҳаваскор шоира Ойбегим Қуёшбек қизи ўзининг «Ҳм-м… Савил-эй» деб номланган янги шеърини шеърият мухлисларига ҳавола этади;

18: 30 да: Қандли диабет хасталигини бартараф этиш масаласига бағишланган «Шакарим» кўрсатуви эфирга чиқади. Кўрсатувда тиббиёт фанлари номзоди Асалхон Орзуқиловна иштирок этади;

19: 30 да: «Сиз уй ҳайвонларини севасизми?» кўрсатувини томоша қилинг. Кўрсатувни хорижлик етук мутахассис Ким Сен Ит хоним олиб боради;

20: 30 да: «Сувараклардан қандай қутулай?..» Бу кўрсатувда профессор Стас Саранчаевнинг қимматли маслаҳатларини тинглайсиз.

22: 00 да: Отарчилар ҳаётига бағишланган «Томсувоққа хушим йўқ» таҳлилий кўрсатувини эътиборингизга ҳавола этамиз. Кўрсатув давомида айнан отарчиларимизнинг жонли қўшиқларидан ҳам тинглаш бахтига мушарраф бўласиз.

01: 00 да: Уйқусизлик касалига йўлиққанлар учун «Хайрли тонг, хайрли тонг ва яна хайрли тонг… Ёки Олимтой, қўрадаги қўйлар нечтайкин?» ҳажвий тележурналимизни мириқиб томоша қилинг.

Олимжон ҲАЙИТ

Олимжон Ҳайитнинг турли мавзулардаги хабарлари, мақолалари, ҳикоялари энди «Телеграмм» даги алоҳида каналда! Бизга қўшилинг, афсусланмайсиз!

t. me/olimjonhayit