ШЕЪРИМ, ЯНА СЕНГА ТАЛПИНДИМ…

1

 

 

ГУЛИМ

(Суюкли умр йўлдошим Светланага бағишлайман)

***

 

Мен гулимни кўздаги нурим билан севганман,

Қалбимнинг қатидаги дурим билан севганман.

Қаҳратоннинг қаттоли қаҳр қилган бир маҳал,

Манглайимда тош қотган шўрим билан севганман,

Мен гулимни кўздаги нурим билан севганман.

***

 

Мен гулимни гулзорнинг баҳоридан қизғондим,

Ҳижрон азоби инган наҳоридан қизғондим,

Майин эсмиш насимнинг оҳоридан қизғондим,

Кафтимдаги бир тутам қўрим билан севганман,

Мен гулимни бахт эрмиш зўрим билан севганман.

***

 

Бахт тилашни билмаслар зинҳор қайрилмасинлар,

Бизнинг балогардонга такрор эврилмасинлар,

Бизлар каби оташда минг бор қоврилмасинлар,

Илоҳий ишқ қасрига зорим билан севганман,

Мен гулимни бағримда борим билан севганман.

***

 

Хиёнатнинг хаёли, нари кетгин, қайтмагин,

Офат-у, дард, ғам бўлиб пешонамга битмагин,

Ошиқ қалбим ёвларга ён бермайди, кутмагин,

Ўзим каби бир хаста хорим билан севганман,

Мен гулимни кўздаги нурим билан севганман.

Олимжон ҲАЙИТ

 

 

Facebook'даги саҳифамизда янгиликларни кузатиш янада қулай!

Марҳамат! Аъзо бўлиш учун "Нравится страница" тугмасини босинг:

1 ТА ФИКР

  1. Kelmadi

    Sahar boqdim yo’liga kelmadi sarviravon
    Bog’zimga keldi alam bilmadi oromijon

    Esayotgan yellardan so’rdim sog’inib uni
    Quyoshga dedim qilgin yorim ahvolin ayon

    Shom tushib gulzor aro zulmat keldi ko’nglima
    Ko’zimdan oqdi daryo mahzun kechada pinhon

    Hilol chiqqach falakka so’rdim malak holini
    «Yuzing oynaku axir et yorimni namoyon»

    Tovonimni tiladi g’am cho’lida tikonlar
    Yorim shodlik bog’idan gul uzmoqda o’sha on

    Qalbimning chechaklari oftobga talpingan payt
    Ayriliqning bo’roni ko’pini etdi yakson

    Buloqdek qaynab chiqar ko’zlarimdan ashklarim
    Bilib oldim yorimning meni sevishi yolg’on

    Qomatimni xam qildi ayriliq iztirobi
    Holim ko’rib boqarlar kishilar hayron -hayron

    Bedor bo’ldim bu oqshom qoldim firoqda g’arib
    Ko’chada tong otsa ham ko’nglim yorishmas hamon

    Yurakka ishq niholin ekib qilmas parvarish
    O’z niholin quritar kechagi tanti bog’bon

    Va’dalar berib yorim ammo vafo qilmadi
    Balki hazil qilgandir
    Balki qilgan imtihon

    Kamina she’rlarini uni deya yozadi
    Yori esa uyida bo’lmaydi bir-bor mehmon

    Eh Anvar! Aldanibsan Sarvinoz hiylasiga
    O’zing dono deysanu ammo sensan eng nodon.
    2013

Comments are closed.