Ўзбекнинг муаллими!

0

Етти кунки юракда алам ўти сўнмайди,
Етмиш йил ўтса ҳамки, кўнгил энди кўнмайди.
Қисмат экан, на чора, деманг, ўв биродарим,
Муаллимни хор қилган миллат борки – унмайди.

Алжабрдан дунёга сабоқ берганимиз рост,
Устурлобда самодан юлдуз терганимиз рост,
Бироқ боболар билан ифтихор қилдик, холос,
Муаллимни хор қилган миллат борки – унмайди.

Ойни ишғол этганлар Миррих – Марс умидида,
Коинотга кўз тикар, тирик сас умидида,
Бизчи яшаймиз ҳамон тўлиқ дарс умидида,
Муаллимни хор қилган миллат борки – унмайди.

Бизнингчалик қайдадир урфон уфурганмикан,
Ё бизнинг муаллимдек кимдир “уф” урганмикан,
Навоийнинг устози кўча супирганмикан,
Муаллимни хор қилган миллат борки – унмайди.

Илиммас, иш қидириб хорижда юрса ўзбек,
Ҳаёсини сидириб, хорижда юрса ўзбек,
Улуғ номин синдириб, хорижда юрса ўзбек,
Муаллимни хор қилган миллат борки – унмайди.

Дўст бўлсангиз алдаманг, рост сўзланг, дер Юртбоши,
Орли бўлинг, ўзбекка хос сўзланг, дер Юртбоши,
Афсус, тўхтамас ҳамон мансаб, амал талоши,
Муаллимни хор қилган миллат борки – унмайди.

Наврўзда тилак қилдим – синфлар бўш қолмасин,
Мактабларни тўлдирсин муаллимлар илими.
Бирор бир ўқитувчига кўчада иш қолмасин,
Дунёга донг таратсин ўзбекнинг муаллими!

Воҳид ЛУҚМОН

Facebook'даги саҳифамизда янгиликларни кузатиш янада қулай!

Марҳамат! Аъзо бўлиш учун "Нравится страница" тугмасини босинг: