«Усмонийлар империяси тарихи» туркумидан: «УСМОН II НИНГ ҒАЗАБИГА УЧРАГАН КАНИЗАК»

0

 

У Майли Шоҳ исмли келиб чиқиши сербиялик канизак эди. Майли Шоҳни тақдир тақозоси билан УСМОН II нинг ҳарамига келтиришади. Ажойиб кунларнинг бирида у султон билан юзма-юз келиб қолади ва нигоҳлар тўқнашуви канизакнинг бахтини очади. Султон УСМОН II Майли Шоҳ ётоғига келтирилишини буюради. Қарабсизки, тез орада Майли Шоҳ ҳомиладор бўлди. Ажойиб кунларнинг бирида УСМОН II қўшинлари билан навбатдаги ҳарбий юришдан қайтаётганда, унга ўғилли бўлгани ҳақида хабар беришади. Ҳа, Майли Шоҳ султон УСМОН II нинг орзусини ҳақиқатга айлантириб, унга шаҳзода ҳадя этганди. Султон дарҳол Идернага йўл олди ва ўша ерга Майли Шоҳ ва шаҳзода олиб келинишини айтди. Пойтахтда шаҳзоданинг шарафига замбараклардан ўқ узилишини буюрди. Афсус, султоннинг қувончи узоққа чўзилмади. Дафъатан янги туғилган шаҳзода оламдан ўтганини маълум қилишди. Бу вазиятда султоннинг қай аҳволда қолганини тасаввур қилса бўлади. Лекин шаҳзоданинг ўлимида у Майли Шоҳни айблади. Хос табиблар шаҳзода замбараклар шовқини туфайли қўрқиб кетган, оқибатда юраги ёрилган бўлиши мумкинлигини айтишса-да, султон УСМОН II ишонмади. Фақат Майли Шоҳни айблайверди. Тез кунда Майли Шоҳ Эски саройга сургун қилинди. У умрининг охиригача шу саройда, ёлғизликда қолиб кетди. Майли Шоҳ 23 ёшида айрилиқ аламидан вафот этди.

Олимжон ҲАЙИТ тайёрлади