СЎЗДАН БОШҚА НЕЙИМ БОР…

0

 

 

* * *

 

Мен сароблар саҳросида сарсонман,

Қора қисмат қаъридаги қурбонман

Меҳр кутар кўзлари тўрт бир жонман,

Кўздан бошқа нейим ҳам бор, Оллоҳим!

 

* * *

 

Дард чекканда жиндай илинж изладим,

Ҳазилакам бўзраймадим…

Бўзладим,

Қаҳратоннинг қаҳри қаттиқ…

Музладим,

Муздан бошқа нейим ҳам бор, Оллоҳим!

 

* * *

 

Осмон тўла юлдуз олис, ой олис,

Қадди расо, қоши камон, ёй олис,

Излай десам, излаб борар жой олис,

Издан бошқа нейим ҳам бор, Оллоҳим!

 

* * *

 

Мени осмон фалагингдан паст қилма,

Қалбим қонсин, баҳорингни бас қилма,

Сўзхонайи харобимга қасд қилма,

Сўздан бошқа нейим ҳам бор, Оллоҳим!

Сўздан бошқа нейим ҳам бор, Оллоҳим!

Олимжон ҲАЙИТ

 

 

 

ФИКР БИЛДИРИШ

Please enter your comment!
Please enter your name here