«Алибобо ва қирқ қароқчи» фильми суратга олинганига 40 йил тўлди. Ҳинд ва ўзбек киночиларининг ижод маҳсули ҳақида 10 та факт

0

1980 йилда экран юзини кўрган, ўзбек режиссёри Латиф Файзиев ва ҳинд режиссёри Умеш Меҳра ҳамкорлигида суратга олинган «Алибобо ва қирқ қароқчи» фильми ҳақидаги маълумотлар билан бўлишамиз.

1. «Алибобо ва қирқ қароқчи» премьерасидан 4 йил аввал ҳам Шри Рам Бохра режиссёрлигида фильмнинг бошқа версияси суратга олинган, унда Житендра, Риной Рой роль ижро қилган. Мусиқаси Лакшмикант ва Пярелал томонидан ёзилган фильм экран юзини кўрмаган.

2. Зинат Аманга суратга тушиш таклиф қилинганида иккинчи даражали қаҳрамонни гавдалантириш ҳамда Ҳема Малинининг соясида қолишни истамаган. Шундан кейин режиссёр Рина Ройни таклиф қилган, аммо у ҳам бош тортган. Иккинчи марта ҳам режиссёр Зинатга таклиф қилганда актриса ишдаги яхши муносабатлари сабаб бу сафар рад этолмаган.

3. Мазкур фильм Дхармендра ва Ҳема Малини биргаликда суратга тушган 17-хит фильм бўлган ва жуфтлик Болливуднинг энг машҳур жуфтлиги деб топилишига сабаб бўлган.

4. Фильм Ҳиндистон, Россия, Италия, Франция, Венгрия, Польша ва деярли бошқа барча мамлакатларда ҳам намойиш қилинган. Аммо энг кўп Ҳиндистон ва СССРда машҳурликка эришган. 1980 йилда Совет кинопрокатида 52,8 миллион томошабин билан етакчи фильмлар орасида 5-ўринни эгаллаган.

5. Ҳиндистонда фильм ярим йилдан кўпроқ вақт экрандан тушмаган. Душанбедаги Бутуниттифоқ кинофестивали ҳамда 1981 йилда Белграддаги кинофестивалда ҳам намойиш этилиб, мукофотга лойиқ топилган.

6. Фильмдаги Khatooba, Khatooba қўшиғи билан боғлиқ қизиқ маълумот: ҳиндлар фильм продюссеридан «ҳатуба» сўзи нимани англатишини сўраганида у рус тилида вино эканини, русларга эса ушбу сўз ҳиндча вино дегани эканини таъкидлаган. Аслида бўлса ушбу сўз композитор Р.Д.Бурман ва матн муаллифи Ананда Бакшининг тўқимаси бўлган ва ҳеч қандай маъноси бўлмаган.

Фильм яратиш жараёнини хотирлаб, Умеш Меҳра шундай деган эди:

«Суратга олиш майдончасида қандай зиддиятларни бошдан кечирганимизни тасаввур ҳам қила олмайсиз. Мен тижорат фильмларида ўсганман. Совет режиссёрларининг эса кинематографияга ўз қарашлари бор эди. Улар тижорий ҳинд фильмлари ҳақида умуман тасаввурга эга эмасди.

‘Ҳатуба’ қўшиғини суратга олаётганимизда ҳамкасбларим билан Зинат Аман рақсга тушадиган ғор туфайли жанжаллашиб қолганмиз. Мен ёритиладиган диско майдон бўлиши керак, деб туриб олганман. Совет режиссёрлари бу фикримга қарши чиқиб, мени еб қўйгудек бўлган. Ғорда диско майдонча қуриш учун бўларим бўлган.

Бироқ бир йилда кейин Тошкентга борганимда биз ресторанга овқатлангани кирганмиз. Ўшанда мусиқачилар мени таниб, ‘Ҳатуба’ни диско чироқлари билан қўйиб берган».

https://www.youtube.com/watch?v=HK-00TTMNig&feature=youtu.be

7. Бурман ғор очилганда эшитиладиган овоз учун тошни жарликдан қулаётгани ёзиб олинган овоздан фойдаланган.

8. Фильм Ҳиндистон, Тошкент, Самарқанд ва Душанбеда суратга олинган. Унда ўзбек, ҳинд, рус, грузин, қирғиз, арман актёрлари рол ижро қилган.

9. Ҳиндистонда намойиш қилинган фильм Совет иттифоқида эфирга узатилганидан 15 дақиқа узоқроқ бўлган. Ҳинд версиясида қўшиқлар сони кўпроқ.

10. Фильм ижодкорлари «Алибобо ва қирқ қароқчи»дан кейин ҳам ҳамкорликда ишлаган ва «Севги афсонаси» ҳамда «Жунгли қонуни бўйича: Шикари» фильмларини суратга олган. Актриса Зинат Аман «Севги афсонасида» иштирок этмаётган бўлган, лекин унинг Совет Иттифоқида машҳурликка эришгани сабаб Латиф Файзиев актриса фильмда иштирок этиши кераклигини билдирган ва шундан кейин Зинат гавдалантирган қаҳрамон образи фильмга қўшилган.

Манба: daryo.uz

loading...