Фарғонада 20 ёшли қиз «Москвич»нинг Катта Фарғона каналига тушиб кетиши оқибатида ҳалок бўлди

0

Марғилонлик 23 ёшли ҳайдовчи бошқарувида бўлган «Москвич» автомобили Катта Фарғона каналининг Қўштепа тумани ҳудудидан ўқиб ўтувчи қисмига тушиб кетиши оқибатида бир киши ҳалок бўлди. Бу ҳақда «Ёшлар» телеканалининг «Янги давр» информацион дастурида хабар берилган.

Маълум қилинишича, 1998 йилда туғилган фуқаро бошқарувидаги «Москвич-412» машинаси 18 январь куни соат 20:40 ларда ҳайдовчи бошқарувни йўқотиб қўйганлиги боис Қўштепа тумани «Шодлик» МФЙ ҳудудида Катта Фарғона каналига тушиб кетган. Ҳайдовчи машина салонидан чиқишга муваффақ бўлган, бироқ машинанинг олд ўриндиғида ўтирган 20 ёшли қизни қутқаришнинг имкони бўлмаган.

Мазкур кўнгилсиз ҳодисанинг эртаси куни ФВВ қутқарув хизмати ва махсус техникалар ёрдамида сувга тушиб кетган машина ҳамда унинг салонида қолиб кетган йўловчи жасади чиқариб олинган.

Айни пайтда ушбу авария юзасидан Қўштепа тумани ИИБ ҳузуридаги тергов бўлими томонидан жиноят иши қўзғатилган ҳамда дастлабки суриштирув ишлари олиб борилмоқда.

Daryo.uz

loading...