Мексиканинг Мехико штатида шифокорлар диабет билан касалланган эркакда мукормикоз (мукормикоз — энг хавфли неврологик инфекциялардан бири) ёки «қора моғор» ташхисини аниқлади. Бу ҳақда «Бугун.уз» «Milenio» нашрига таяниб хабар берди.
Маълум қилинишича, беморда қўзиқорин инфекцияси коронавирусдан даволанганидан сўнг аниқланган. Ўз навбатида шифокорлар эркакнинг ҳаёти хавф остида экани ва зудлик билан жарроҳлик операцияси ўтказиш кераклигини айтган.
Таъкидланишича, беморга 10 май куни коронавирус ташхиси қўйилган. Қандли диабетга қарамай, у уйда даволанган. Аммо 26 майда унинг аҳволи кескин ёмонлашиб, овқатланишни тўхтатган. Уч кундан сўнг юз асаб тизимининг фалажи билан касалхонага ётқизилган.
Қайд этилишича, бемор 1 июнда гапиришни тўхтатган. Ҳозирда эркакда мия инфекцияси ва ўлим хавфи юқори ҳисобланади. Шифокорлар унинг чап кўзини жарроҳлик операцияси орқали олиб ташламоқчи.
