Ўзбекистон Қирғизистондаги театрни таъмирлашга 5 млн доллар сарфлайди

0

13 сентябрь куни Қирғизистоннинг Ўш шаҳрида жойлашган Бобур номидаги Ўш академик ўзбек мусиқали драма театрининг тўлиқ реконструкцияси бошланди, деб хабар берди шаҳар мэрияси матбуот хизмати.

Шаҳар маъмурияти маълумотларига кўра, театрни реконструкция қилиш Ўзбекистон ва Қирғизистон ҳукуматлари ўртасида халқаро икки томонлама ижтимоий-иқтисодий алоқаларни мустаҳкамлаш бўйича эришилган келишувларга мувофиқ бошланган.

Театр реконструкциясини якунлаш келаси йилнинг бошига режалаштирилган. Ишнинг умумий қиймати 5 млн долларни ташкил этади. Kloop Ўзбекистон лойиҳани молиялаштиришини қайд этмоқда.

Театрнинг 100 йиллиги шарафига капитал таъмирлаш режалаштирилган эди. Ушбу қарор Қирғизистон президенти Садир Жапаровнинг Ўзбекистонга ташрифи чоғида қабул қилинган. Юбилей 2018 йил октябрь ойида нишонланиши керак эди, лекин уч йил олдин тадбир кўчирилди, чунки театр таъмирлашга муҳтож эди, деб ёзади нашр.

Тақдим этилган лойиҳага кўра, театр биноси тўлиқ таъмирланади.

Бобур номидаги Ўш Давлат академик ўзбек мусиқали драма театри Ўрта Осиёдаги энг қадимги профессионал театрлардан бири. У 1914 йилда Раҳмонберди Мадазимов томонидан ташкил этилган. 1992 йилда Қирғизистон мустақилликка эришгач, театр Бобурийлар сулоласи ва империяси асосчиси Захириддин Муҳаммад Бобур шарафига қайта номланди. Ундан олдин у инқилобчи Сергей Киров номида бўлган. Театр 480 нафар томошабинга мўлжалланган.

Ўтган йиллар мобайнида жамоа ўзбек, рус, тожик, қирғиз ва жаҳон классикларининг энг машҳур асарлари ҳамда жаҳон халқларининг замонавий драмаси бўйича 600 дан ортиқ спектаклларни саҳналаштирди.

gazeta.uz

loading...