Toshkent metropolitenining «Chilonzor» yo'nalishida joylashgan «Xalqlar do'stligi» bekatida poezd vagonlaridan birining eshigida nosozlik kuzatildi, deb xabar beradi metropoliten matbuot xizmati.
Ma'lum qilinishicha, 22 sentyabr kuni soat 08:37 da «Xalqlar do'stligi» bekatida 13-yo'nalishdagi harakat tarkibining 2-vagonidagi 4-eshiklari texnik nosozlik tufayli yopilmay qolgan. Harakat xavfsizligini ta'minlash maqsadida yo'lovchilar ushbu poezddan tushirilgan. Ortdan kelayotgan 5-yo'nalishdagi harakat tarkibi bir daqiqada yetib kelib, yo'lovchilarni olib ketgan.
«Keltirilgan noqulayliklar uchun yo'lovchilardan uzr so'raymiz», — deyiladi xabarda.
