“Noshirlik faoliyati to'g'risida”gi Qonun qabul qilindi

0

“Noshirlik faoliyati to'g'risida”gi Qonun Prezident tomonidan imzolandi.
Xabarga ko'ra, noshirlik faoliyati sub'yektlari o'z faoliyatida mustaqildir.

Nashrga tayyorlangan qo'lyozmalarni va materiallarni senzuradan o'tkazishga yo'l qo'yilmaydi.

Fuqarolarning sha'ni va qadr-qimmati yoki ishchanlik obro'siga putur yetkazuvchi, mazmuniga ko'ra ularning shaxsiy hayotiga aralashuv deb qaralishi mumkin bo'lgan nashrlarni hamda noshirlik mahsulotini chiqarish va tarqatish taqiqlanadi.

Noshirlik faoliyati sohasi Vazirlar Mahkamasi va Prezident Administratsiyasi huzuridagi Axborot va ommaviy kommunikatsiyalar agentligi tomonidan tartibga solinadi.

Qonunga ko'ra, noshirlik faoliyatining sub'yektlari quyidagilardan iborat:
nashriyot;

tayyorlovchi;
buyurtmachi;
tarqatuvchi.

Noshirlik faoliyati xabardor qilish tartibida amalga oshiriladi.

Quyidagi hollarda xabardor qilish tartib-taomillaridan o'tish talab etilmaydi:

davlat organlari, markaziy muassasalar, sudlar, prokuratura organlari tomonidan rasmiy materiallar, normativ-huquqiy hujjatlar to'plamlarini nashr etishda;
respublika ahamiyatiga ega nodavlat va notijorat tashkilotlari, shuningdek tashkilotlar, ta'lim va ilmiy muassasalar tomonidan o'z faoliyati uchun zarur bo'lgan, ommaviy ravishda tarqatish yoki qo'lyozma huquqi asosida ko'paytirish uchun mo'ljallanmagan materiallarni nashr etishda;
ommaviy axborot vositalari ushbu OAV tahririyatlari tomonidan chop etilganda.

Noshirlik mahsulotlari tarqatuvchi tomonidan shartnomalar asosida tarqatiladi.

Qonun rasmiy e'lon qilingan kundan e'tiboran kuchga kiradi.