Аввалроқ Маданият вазири Озодбек Назарбеков 20 декабрь куни пойтахтда “Тошкент ёшлар форуми–2021” доирасида ёшлар билан учрашгани, шундан сўнг, бир гуруҳ ОАВ саволларига ҳам жавоб бергани ҳақида ёзган эдик. Шу ўринда, Назарбеков «Мендирман Жалолиддин» сериалининг суратга олинишида юзага келган камчиликлар, уни юқори натижа бериши учун нима халақит берганини ҳам маълум қилди.
«Жараён давомида пандемия бўлди»,-дейди Назарбеков.
«Айнан шу оёғимизга болта урди. Биласизми, бу вақтда харажатларимиз ўз-ўзидан ошиб кетди, биз умуман кутмаган муаммолар пайдо бўлди. Бутун Истанбулда ҳаракат чекланган бир вақтда, биз кино олдик, тасаввур қиляпсизми?! Бўлди, эплай олмас эканмиз, деган ҳолатгача келдик. Лекин халқимизга ваъда қилганимиз учун сабр билан ҳаракат қилдик. Мана, ўзингиз кўрдингиз, бутун бошли лойиҳалар шу пандемия сабаб тўхтаб қолди. Мамлакатларда бошланган катта ишлар якунланмай қолди. Шундай жараёндан бизни чиқиб кетишимиз — бу кичик гап эмас, аслида»,-дейди у тушунтириш берар экан.
