Қирғизистоннинг собиқ президенти Асқар Акаевга нисбатан «Қумтор» олтин кони атрофидаги коррупцияга оид айбловлар бекор қилинди ва Акаев кеча Москвага қайтиб кетди.
Тергов Акаевнинг «Centerra»да улуши йўқлиги, «Қумтор»дан ҳеч қандай фойда олмагани аниқланган. Энди Акаев исталган кун Қирғизистонга уча олади. 14 декабрь куни Акаев Қирғизистон Миллий хавфсизлик давлат қўмитасига (ГКНБ) сўроқ қилиш учун Бишкекка етиб келганди.
Эслатиб ўтамиз, 2005 йилда мамлакатда ҳокимият алмашганидан кейин мамлакатни тарк этган Акаев шу йил 2 август куни биринчи бор Бишкекка келганди. Республика Миллий хавфсизлик давлат қўмитасида «Қумтор» олтин кони иши бўйича сўроқдан сўнг у қўйиб юборилди. Орадан бир ҳафта ўтиб Акаев Москвага қайтиб кетди.
