Prezidentning yangi qarori ommaga e'lon qilindi

0

«Ko'p kvartirali uylarni boshqarish tizimini yanada takomillashtirish va boshqaruvchi tashkilotlarni moliyaviy sog'lomlashtirish borasidagi qo'shimcha chora-tadbirlar to'g'risida»gi Prezident qarori (PQ–346-son, 04.08.2022 y.) qabul qilindi.

Qaror bilan 2022 yil 1 sentyabrgacha muammoli kredit qarzi bor uy-joy mulkdorlari shirkatining (JEK) boshqaruv usulini o'zgartirish bo'yicha umumiy yig'ilish qarori qabul qilinsa, ular davlat tomonidan qo'llab-quvvatlanadi.

Bunda:

– muammoli bank kreditlari bor shirkatlar bankning xulosasi olingan taqdirda tugatilishi mumkin;
– tugatilgan yoki boshqarish usuli o'zgartirilgan shirkatlar boshqaruvidagi ko'p kvartirali uylarni boshqarish uchun, qoida tariqasida, reytingi yuqori bo'lgan boshqaruvchi tashkilotlar jalb qilinadi;
– Uy-joy kommunal xizmat ko'rsatish vazirligi jalb qilingan boshqaruvchi tashkilot faoliyatini, xizmatlar sifatini 6 oy monitoring qiladi va ko'p kvartirali uylarni boshqarish faoliyatini amalga oshirish qoidalariga rioya qilmagan boshqaruvchi tashkilotlarga choralarni qo'llaydi.

2022 yil 1 noyabrdan:

– ko'p kvartirali uylarni boshqarish organlari boshqaruv faoliyatini, ular elektron reestrga kiritilgandan so'ng amalga oshiradi;
– uylarni qurish loyiha hujjatlarida, kadastr pasportida umumiy foydalanishdagi mulk ro'yxati aniq ko'rsatiladi;
– qurilishi tugallangan ko'p kvartirali uylarga ruxsatnoma berilganidan so'ng loyiha hujjatlari, kadastr pasporti va mazkur ruxsatnomaga umumiy mol-mulkni kamaytirish va tutash yerda qo'shimcha ob'yekt qurish uchun o'zgartirish kiritish taqiqlanadi.