Россиянинг Вашингтонгдаги элчиси Анатоли Антонов АҚШ маъмуриятининг Украинага навбатдаги ҳарбий ёрдам пакетини юбориш тўғрисидаги қарорига муносабат билдирди. Элчининг сўзларига кўра, Вашингтон «оловга мой сепиш»да давом этмоқда.
«АҚШнинг Украинага ҳарбий ёрдам юбориш учун қўшимча бир миллиард доллар маблағ ажратиши унинг ақл билан иш кўрмаётгани ва Киев ва Москва ўртасидаги можарони тинч йўл билан ҳал қилишга ҳисса қўшиш ниятида эмаслигини тасдиқлайди», — дейди Антонов элчихонанинг расмий телеграм-саҳифасида эълон қилинган баёнотда.
Дипломатнинг таъкидлашича, АҚШнинг Украинага ёрдам беришидан асосий мақсад унинег музокаралар столига ўтиришга бўлган позициясини иложи борича салбий томонга ўзгартиришдир. Элчининг қўшимча қилишича, Вашингтон мазкур можаро узоқроқ давом этишини истаяпти ва Россия билан бўлган қарама-қаршилигида Украинадан фойдаланяпти.
Шунингдек, Антонов Вашингтон Киев расмийлари орасида Россияни мағлуб этиш мумкин деган хом хаёлларни уйғотаётгани ва бунинг натижасида эса Россияда ҳам Украинада ҳам уруш қурбонлари сони кўпайиб бораётганини таъкидлаган.
«АҚШнинг бундай ҳаракатлари Украина хавфсизлиги ва икки мамлакатнинг тинчлиги учун ҳеч қандай наф бермайди, аксинча, бу фақат украиналикларнинг уруш натижасида тортаётган азобларини кучайтиради холос», — дейди дипломат.
