“Журналист Эд Лоуренс Хитойда бўлиб ўтаётган қатъий ковид чекловларига қарши норозилик намойишлари пайтида ҳибсга олинган ва бу ҳам етмагандай калтакланган”, – деб хабар беряпти BBC телерадиокомпанияси.
Хитой полицияси намойишни ёритган BBC журналистига ҳужум қилди ва ҳибсга олди. Бир неча соатлик текширувлардан кейин қўйиб юборди.
“Шанхайдаги норозилик намойишларини ёритаётганда ҳибсга олинган ва намойишкорона қўлларига кишан тақилган журналистимиз Эд Лоуренснинг тазийққа учраганидан хавотирдамиз, – дейди Британия Давлат телевиденияси вакили, – У озод этилишидан олдин бир неча соат ушлаб турилган. Ҳибсга олиниш чоғида полициячилар Лоуренсни калтаклаган ва тепган. Аккредитациядан ўтган ҳолда фаолият юритаётган журналистга нисбатан қўлланилган ушбу ғайриинсоний муносабат ҳукуматимизни ҳам ташвишлантиряпти”.
Кейинроқ, Лоуренс ўз баёнотини ижтимоий тармоқ фойдаланувчиларига улашди. Полициянинг куч ишлатишига нисбатан қаршилик қилаётган фуқароларнинг ҳам ҳибсга олинаётганлигини маълум қилди. Хитой ташқи ишлар вазирлиги Ахборот хизмати директори ўринбосари Чжао Лицзянь, BBC воқеани нотўғри талқин қилаётгани ва журналист ўз вақтида ҳужжатларини кўрсатмаганлигини баҳона қилди.
“Бизнинг билишимизча, BBCнинг баёнотлари ҳақиқатга тўғри келмайди. Расмийлар томонидан келтирилган далилларга кўра, хорижлик журналист хавфсизлик полициясига шахсини тасдиқловчи ҳужжатларини кўрсатишни истамаган”, – дейди бунга жавобан Чжао.
Хитойдаги хорижлик мухбирлар воқеаларни жойидан ёритиши учун аккредитациядан ўтганлиги ҳақидаги картани олиб юришлари шарт. Шанхайдаги коронавирус чекловларига қарши норозилик намойишлари мамлакатнинг узоқ ғарбидаги ёнғиндан сўнг янада авж олди. Юз бераётган воқеаларни ёритаётган журналист Эд Лоуренснинг фикрича, хитойлик хавфсизлик ходимлари имкон қадар хорижликларни кузатишга ҳаракат қилишмоқда.
