Жаҳон соғлиқни сақлаш ташкилоти маълумотларига кўра, ўтган йили дунёда пандемия сабабли қизамиққа қарши ўз вақтида эмланмаслик оқибатида ушбу касалликни юқтириш билан боғлиқ 9 миллионта ҳолат қайд этилган. Энг ёмони, беморларнинг 128 минг нафари ҳаётдан кўз юмган.
Хасталикнинг яширин даври 6-18 кунни ташкил этади. У иситма кўтарилиши, тананинг барча жойида тошма, шиллиқ қаватларнинг яллиғланиши каби асосий белгилар билан намоён бўлади. Болада ҳолсизлик, кўз қизариб ёшланиши кузатилиб, инжиқланади. Шунингдек, иштаҳасизлик, тез-тез ич кетиши, бош оғриғи, қусиш, бурун қонаши, қорин оғриғи кузатилиши мумкин.
Қизамиққа қарши вакциналарнинг самарадорлиги жуда юқори. Юртимизда миллий эмлаш календарига асосан ушбу вакцина билан 6 ойликдан 5 ёшгача бўлган болалар эмланади.
Фақат камдан-кам ҳоллардагина малҳам юборилган жойда оғриқ, сезгирликнинг ошиши каби енгил ножўя таъсирлар кузатилиши мумкин.
