Amerikaning SpaceX kompaniyasi yakshanba kuni Starlink tarmog'ining yangi avlodi – 22 ta mikro sun'iy yo'ldoshiga ega Falcon-9 raketa tashuvchisini uchirdi, deya xabar bermoqda TASS.
Efir kompaniya saytida olib borildi.
Raketa Kanaveraldagi (Florida shtati) kosmodromdan mahalliy vaqt bilan 08:20 (Moskva vaqti bilan 15:20) da uchirildi. Falcon-9 ning birinchi bosqichi avvalgi ikkita uchirishda ishlatilgan. Uchirishdan taxminan to'qqiz daqiqa o'tgach, u avtomatik ravishda Atlantika okeanida joylashgan suzuvchi platformaga qo'ndi. Raketa pog'onalarini qayta-qayta ishlatish Ilon Mask boshchiligidagi kompaniyaga transport vositalarini orbitaga chiqarish xarajatlarini kamaytirish imkonini beradi.
Kompaniya saytida qayd etilganidek, bu safar orbitaga 22 ta yangi avlod Starlink sun'iy yo'ldoshi chiqariladi. SpaceX ma'lumotlariga ko'ra, ikkinchi avlod mikro sun'iy yo'ldoshlari kengroq chastota diapazonida ishlaydi va internetning yuqori tezligini ta'minlaydi.
Starlink tarmog'i 5G standartiga mos keladigan 1 Gbit/s trafik tezligi bilan dunyoning istalgan nuqtasidan Internetga kirishni ta'minlash uchun mo'ljallangan. Kompaniya orbitaga 4500 dan ortiq mikro sun'iy yo'ldoshlarni yetkazgan. 4100 ga yaqin sun'iy yo'ldoshlar ish holatida, qolganlari texnik sabablarga ko'ra ishdan chiqqan yoki orbitadan chiqib ketgan. SpaceX hisob-kitoblariga ko'ra, jami 11 mingta sun'iy yo'ldoshni uchirish va ularni ishga tushirish 10 milliard dollarga tushadi.
