Ливиянинг Дерна шаҳрида ўтган ҳафта юз берган ҳалокатли сув тошқинига расмийлар томонидан тегишли чоралар кўрилмагани учун юзлаб намойишчилар шаҳар мэрининг уйини ёқиб юборди, деб хабар беради Kazinform агентлиги BBC Newsга таяниб.
Намойишчилар душанба куни кечқурун шаҳардаги Саҳоба масжиди олдида тўпланиб, кўпчилик Ливия ҳукуматининг юқори амалдорларини ишдан бўшатишга чақиришди. Натижада, Дерна шаҳар кенгаши энди тарқатиб юборилди.
Интернет ва мобиль аълоқага чиқиш блокланган ва оммавий ахборот воситаларига тўсқинлик қилиш мақсадида журналистларга мамлакатни тарк этишга буйруқ берилган.
Икки эски ва вайронага айланган тўғон қулаб, шаҳарни сув босганидан кейин 10 мингдан ортиқ одам расман бедарак йўқолган.
БМТ хабарига кўра, Ташкилот гуруҳларидан бирига Дернага киришга рухсат берилмаган.
«Биз воқеа жойида қидирув-қутқарув гуруҳлари, тез тиббий ёрдам гуруҳлари ва Дернада бўлган БМТ ҳамкасбларимиз ишлашда давом этаётганини тасдиқлашимиз мумкин», – деди ташкилот вакили.
Намойишчиларнинг фикрича, шаҳар ҳокимияти уларни катта миқдорда ёмғир кутилаётгани ҳақида огоҳлантирмаган. Улар эвакуация қилишни буюргандан кўра, уйда қолишни маслаҳат беришганини айтишди. Расмийлар бу версияни рад этишади.
Узоқ йиллик раҳбар Муаммар Қаддафий ағдарилганидан кейин ҳокимият учун кураш натижасида парчаланиб кетган Ливияда ҳозирда иккита ҳукумат мавжуд – бири Триполида, иккинчиси эса мамлакат шарқида уруш қўмондони генерал Халифа Хафтар томонидан қўллаб-қувватланади.
