Эҳтиёжманд оилалар учун 1,5-2 KW•h қувватга эга қуёш панеллари бепул ўрнатиб берилади
Эҳтиёжманд оилалар учун 1,5-2 KW•h қувватга эга қуёш панеллари бепул ўрнатиб берилади
calendar
22:39
19
Энергетика вазири Жўрабек Мирзамаҳмудовнинг маълум қилишича, 20 мингга яқин эҳтиёжманд оилаларга 1,5-2 KW•h қувватга эга қуёш панеллари бепул берилади. Панеллар қуввати асосий электр энергиясига бўлган базавий миқдор – 200 KW•h’гача бўлган эҳтиёжни қоплашга етади.
Фото: Энергетика вазирлиги
Ўзбекистонда эҳтиёжманд оилалар учун қуёш панелларни бепул ўрнатиб бериш режалаштирилмоқда. Бу ҳақда Энергетика вазири Жўрабек Мирзамаҳмудов UzReport телеканалига берган интервьюсида айтиб ўтган.
«Биз ҳозир дастур тайёрлаяпмиз. Ёзда уй хўжаликларининг истеъмоли ортади. Агар битта ёки иккита кондиционерга эга кам таъминланган оила бўлса, уларга 1,5-2 KW•h қувватга эга қуёш панелларини ўрнатишни режалаштирганмиз. Бу борада ҳамкорларимиз билан иш бошладик», – деди у.
Энергетика вазирининг қўшимча қилишича, Саудиянинг ACWA Power компанияси билан биргаликда ижтимоий муассасаларда қуёш батареялари ўрнатиляпти. Энди бу амалиёт кам таъминланган оилалар учун ҳам жорий қилинди. Бунда 20 мингга яқин эҳтиёжманд оилалар рўйхати «маҳалла еттилиги» ҳамда Ижтимоий ҳимоя агентлигининг рестри асосида шакллантирилади. Панеллар қуввати асосий электр энергиясига бўлган базавий миқдор – 200 KW•h’гача бўлган эҳтиёжни қоплашга етади.
