Суперлига баҳслари кичик танаффусдан сўнг қайтмоқда
Футбол бўйича Ўзбекистон Суперлигаси ФИФА кунлари сабаб 12 кунлик танаффусдан сўнг бошламоқда. Эртага, 14 июнь куни миллий чемпионатимизнинг 11-турига старт берилади ва бу тур 17 июнга қадар давом этади.
Бугун мусобақанинг 6-турида қолдирилган учрашуви ўтказилади. Унда «Динамо» ўз майдонида «Олимпик»ни қабул қилади. Учрашув Жиззахдаги «Сўғдиёна» марказий стадионида соат 20:00 да бошланади.
Мазкур қолдирилган ўйин натижаси гарчи чемпионат пешқадамлигига таъсир этмасада, икки жамоа учун Суперлига жадвалидаги ўз ўринларини янада яхшилаб олишига имкон яратади.
Маълумот ўрнида айтиш жоизки, мусобақа жадвалида 10-тур якунига кўра, «Насаф» 19 очко билан жадвални бошқараётган бўлса, «Навбаҳор», «ОКМК», «Нефтчи» 17 очко билан кейинги ўринлардан жой олди. «Пахтакор» 15 очко жамғариб, 5-ўринга кўтарилди. «Андижон» ва «Сўғдиёна» 14, «Сурхон» 12, «Динамо» ҳамда «Қизилқум» бир хил – 10 очко жамғарган ҳолда кучли ўнликдан ўрин эгаллади. «Олимпик» ва «Локомотив» жамоаси 9 очко билан 11-12-ўринда бораётган бўлса, «Бунёдкор» 6, «Металлург» эса 5 очко билан қуйи поғоналарда бормоқда.
Агарда бу ўйинда «Олимпик» ғалаба қозонса, «Динамо» ва «Қизилқум»дан илгарилаб кетади, «Сурхон» клуби билан бир хил – 12 очко жамғарган ҳолда 8-9-ўриндан жой олади. Аксинча, «Динамо» клуби ғолиб бўлса, 13 очко жамғарган ҳолда 8 ўринга чиқади. Фақатгина ушбу жамоалар баҳсида дуранг қайд этилса, «Динамо» 11 очко билан 9-поғонани мустаҳкамлайди, «Олимпик» эса «Қизилқум»га очколар бўйича етиб олади.
Миллий чемпионатимизнинг 11-тур учрашувлари эса 14 июнь куни «Металлург» – «Бунёдкор» клублари ўртасида бўлиб ўтади. 15 июнь куни «Нефтчи» – «Сурхон», «Қизилқум» – «Андижон» қарама-қаршилигига гувоҳ бўламиз. 16 июнь куни «Сўғдиёна» ўз майдонида «Насаф»ни қабул қилса, «Пахтакор» Тошкентда «Навбаҳор»ни меҳмон қилади. Турнинг сўнгги учрашувлари 17 июнь куни «Локомотив» – «Динамо», «Олимпик» – «ОКМК» клублари ўртасида кечади.
Суперлига 11-тур баҳсларининг бошланиш вақти барча ўйинларда соат 20:00 этиб белгиланди.
