Трампга суиқасд уюштириш: Байден ватандошларидан отишманинг сабаблари ҳақида хулоса чиқаришга шошилмасликни сўради
АҚШ президенти Жо Байден ватандошларини Дональд Трампни отиб ташлаган шахснинг сабаблари юзасидан айблов ва хулосаларга шошилмасликка чақирди.
«Ҳаммани унинг мотивлари ёки сиёсий мансублиги ҳақида тахмин қилмасликка чақираман. ФҚБ ва унинг ҳамкор агентликлари бу ишни қилсин», деди Байден якшанба куни собиқ президент ва Байденнинг ноябрдаги сайловлардаги бўлажак рақибига суиқасддан кейинги вазият ҳақида қисқача брифингда.
Трамп лагеридаги кўплаб республикачилар суиқасддан сўнг бунга Трампнинг Демократик партиядан бўлган рақиблари томонидан яратилган умумий муҳит сабаб бўлганини, барча гуноҳларда собиқ президентни айблаганини айтишди.
Айни пайтда, Америка матбуотининг ёзишича, Трамп ва унинг сайловолди митинги иштирокчиларига қарата ўқ узган 20 ёшли Томас Крукс расман Республикачилар партияси тарафдори сифатида рўйхатга олинган.
Жо Байден брифингда Трампнинг хавфсизлиги кучайтирилишини, шунингдек, душанба кунидан бошлаб Трамп президентликка номзод сифатида расман кўрсатиладиган Республикачилар партияси митинги хавфсизлиги кучайтирилишини айтди.
«Мен Махфий хизмат раҳбарига барча хавфсизлик чораларини кўриб чиқишни топширдим», деди Байден.
Бундан ташқари, АҚШ президенти Пенсилваниядаги сайловолди митингида Трамп ва унинг тарафдорларига уюштирилган суиқасд юзасидан мустақил тергов ўтказишга буйруқ берганини маълум қилди.
