Франция россиялик ва беларуслик журналистларни Олимпиадага киритмайди
Франция ҳукумати жосусликдан хавотирланиб, бир неча ўнлаб хорижликларга Париждаги ёзги Олимпиада ўйинларига киришни рад этди. Тақиқ Россия, Беларус ва бошқа бир қатор мамлакатлардан келган юзга яқин кишига тааллуқли, деди мамлакат ички ишлар вазири Жералд Дарманен Le Journal du Dimanche нашрига берган интервюсида.
Унинг аниқлик киритишича, гап 2024 йилги Олимпиадага журналист, физиотерапевт ёки техник ходимлар ниқоби остида келишни истаган хорижликлар ҳақида кетмоқда. «Эҳтимол, улар бу ерга ҳужумлар уюштириш учун келмайди. Лекин, разведка ва анъанавий жосусликдан ташқари, киберҳужумларни амалга ошириш учун компютер тармоқларига кириш нуқталаридан бохабар бўлиб туриш керак», – деди Дарманен. Шу билан бирга, Халқаро олимпия қўмитасида ишлайдиган россияликларга ўйинларда қатнашиш учун рухсат берилди.
«Биз ўйинларни ёритишни хоҳлаётганини даъво қилган кўп сонли «журналистлар»га рад жавоби бердик, бошқа томондан, эҳтиёткорлик тамойилидан келиб чиққан ҳолда Халқаро олимпия қўмитасида ишлаётган россияликларга рухсат бердик», деди вазир.
Умуман олганда, Жералд Дарманен сўзларига кўра, разведка хизматлари томонидан текширилган 960 минг шахсдан 4340 кишига, жумладан кўнгиллилар, стадион ишчилари ва спорт делегациялари аъзолари 2024 йилги ёзги Олимпиада ўйинларида ишлаш ҳуқуқидан маҳрум қилинган. Гап террорчилик, ўнг ва сўл радикал фаолият, шунингдек, илгари жиноят содир этганликда гумон қилинганлар ҳақида бормоқда.
26 июл куни Парижда бошланадиган ёзги Олимпия ўйинларида 15 нафар россиялик ва 16 нафар беларуслик спортчи иштирок этади, улар нейтрал мақомда қатнашади.
