Байден 2 йил аввал Украина ва Россия ўртасидаги тинчлик битимини “торпеда” қилган
АҚШдаги сайлов пойгасида мустақил номзод сифатида иштирок этган кичик Роберт Кеннеди 2022 йилда АҚШ президенти Жо Байден Украина ва Россия ўртасида келишув имзоланишига тўсқинлик қилганини айтди.
Кичик Кеннеди Аризона штатининг Феникс шаҳрида сўзлаб, президентлик пойгасини тарк этишини ва собиқ президент, Республикачилар партиясидан номзод Доналд Трампни қўллаб-қувватлашини маълум қилди. Ушбу қарорнинг сабаблари ҳақида гапирар экан, сиёсатчи АҚШнинг собиқ президентининг Россия Федерацияси ва Украина ўртасида тинчлик музокараларини бошлашга тайёрлигига эътибор қаратди. Хусусан, кичик Кеннеди ўз нутқида Украинадаги мавжуд вазиятда Байден маъмуриятини айблади.
Сиёсатчининг сўзларига кўра, Россия президенти Владимир Путинни Украинада қадам ташлашга «қўзғатган» айнан Қўшма Штатлардир. «Мен Путиннинг Украинага бостириб киришини оқламайман, унинг бошқа имкониятлари ҳам бор эди. Бироқ, Америка оммавий ахборот воситалари АҚШ халқига икки ядровий қурол бўйича келишувдан бир томонлама чиқиб кетганимизни ва Руминияда ядровий ракета тизимларини ўрнатганимизни кўп айтмайди», — деди у.
Кичик Кеннеди Украинадаги уруш 2014 йилда АҚШ демократик йўл билан сайланган ҳукуматни ағдариб, ҳокимиятга ғарблик кишини олиб келганида бошланганини, сўнгра этник русларга қарши қонли амалиётлар бошланганини таъкидлади.
«2022 йил апрель ойида Байден (ўша пайтда Буюк Британия бош вазири) Борис Жонсонни Зеленскийни Россия билан имзолаган тинчлик шартномасини бузишга мажбурлаш учун Украинага юборди. Бу тинчлик битими минтақага тинчлик олиб келиши мумкин», – дейди сиёсатчи.
Унинг қайд этишича, Украина урушининг оммага эълон қилинган мақсадлари АҚШ миллий манфаатларига ҳеч қандай алоқаси йўқ. «Украина бу урушда Ғарбнинг қурбони бўлди», деб ҳисоблайди сиёсатчи.
