Туркий дунёнинг ягона алифбоси лойиҳаси якунланди
Озарбайжоннинг Баку шаҳрида 9-11 сентябрь кунлари Халқаро туркий академия ва Турк лингвистик жамияти томонидан ташкил этилган умумий турк алифбоси бўйича комиссиянинг учинчи сессияси муваффақиятли якунланди.
Туркий тиллар академиясининг маълум қилишича, йиғилишдан кўзланган асосий мақсад ушбу йўналишда олиб борилган тадқиқотлар ва комиссиянинг икки йиллик тажрибаси асосида туркий тиллар алифбоси бўйича қўшма лойиҳа устида ишларни якунлаш бўлган.
Қайд этилишича, учрашувда олимлар томонидан илк бор 1991 йил таклиф этилган лотин алифбосига асосланган туркий дунёнинг ягона алифбоси ҳар томонлама муҳокама қилинган.
“Комиссия фаолияти натижасида 34 та ҳарфдан иборат умумий туркий алифбо бўйича келишувга эришилди. Таклиф этилаётган алифбонинг ҳар бир ҳарфи туркий тилларда учрайдиган алоҳида фонемани ифодалайди”, дейилади хабарда.
