“Хелен” тўфони АҚШни қамраб олди
“Хелен” тўфони Флорида қирғоқларига келиб, Жоржия ва Жанубий Каролина томон йўл олди, қурбонлар бор, деб хабар беради NBC News.
4-тоифали довул Флорида шимолидаги Биг-Бенд минтақасида максимал шамол тезлиги 140 миля (225,3 км/соат) ни ташкил этди.
Қайд этилишича, тўлқинлар баландлиги 20 футга (6 метр) етган. Миллий океан хизматининг Леви округидаги Сидар-Кидаги сув оқими ўлчагичи сув сатҳи ўртача 8,68 фут (2,6 метр) дан юқори бўлганини маълум қилди, бу эса штатда сув тошқинига сабаб бўлди.
Флориданинг 67 та округидан 61 тасида фавқулодда ҳолат эълон қилинган, бир қанча округларда эвакуация қилиш ҳақида буйруқ берилган.
«Power Outage.us» сайтига кўра, Флоридада 1 036 553 та уй ва корхона электр таъминотисиз қолган. Энг кўп узилишлар Форс кўрфази қирғоғида содир бўлган.
Довуллар бўйича миллий марказ маълумотларига кўра, Флорида штатидаги Перри-Фоли аэропортида 99 миля (159 км/соат) шамол тезлиги қайд этилган.
Флорида штатининг Тампа шаҳрида бир ҳайдовчи машинасига белги қулаши оқибатида вафот этди.
Довул жанубий Жоржия томон йўл олди ва максимал шамол тезлиги соатига 110 милни ташкил этади, бу уни 2-тоифали «Саффир-Симпсон» довулига айлантиради.
Жоржия жанубидаги Валдоста, Томасвилл ва Куитман шаҳарлари “экстремал шамолдан огоҳлантириш” остида. Аҳолига зудлик билан ёпиқ жойларга ёки бошпаналарга кўчиш тавсия этилади.
Жоржия штатининг Уилер округида кучли шамол кўчма уйни ағдариб юбориши оқибатида икки киши ҳалок бўлди.
Президент Жо Байден Жанубий Каролинада фавқулодда ҳолат эълон қилишни маъқуллади ва штатга 40 дан ортиқ округларда “Хелен” тўфони оқибатларини бартараф этиш учун федерал ресурс ажратишни буюрди.
