Россия ва Сербия президентлари Украина атрофидаги вазиятни муҳокама қилди
Россия Президенти Владимир Путин ва Сербия Республикаси Президенти Александр Вучич телефон орқали мулоқотда турли соҳаларда ўзаро манфаатли ҳамкорликни янада мустаҳкамлаш тарафдори эканликларини тасдиқладилар. Бу ҳақда 20-октабр, якшанба куни Кремль матбуот хизмати хабар берди.
«Раҳбарлар Белграднинг фашист босқинчиларидан озод қилинганининг 80 йиллиги муносабати билан бир-бирини табриклади. 1944 йилнинг шу куни Югославия Халқ Озодлик Армияси бўлинмалари иштирок этган Совет Армиясининг Белград ҳужум операцияси якунланди. Бу Болқондаги Иккинчи жаҳон урушининг якуний босқичидаги муҳим воқеалардан бирига айланди», — дейилади хабарда.
Томонлар маънавий, маданий ва тарихий ҳамжиҳатликка, ўтмиш ва бугунга баҳолар бирлигига асосланган икки томонлама муносабатлар даражасидан мамнун эканликларини билдирдилар, дея таъкидлади Кремль.
