АҚШ-Европа уруши: ЕИ «қаттиқ зарба» тайёрлади
Европа Иттифоқи, агар республикачи Доналд Трамп президентлик сайловларида ғалаба қозонса, АҚШ билан кенг кўламли савдо урушига ҳозирлик кўрмоқда, деб ёзади Политиcо журнали Брюссел ва Европанинг бошқа пойтахтлари юқори мартабали дипломатлари ва расмийлари ўртасидаги аноним манбаларга таяниб.
«Биз тез ва қаттиқ жавоб берамиз», деди юқори мартабали дипломат.
Европанинг бошқа давлатидан келган иккинчи дипломатнинг айтишича, иттифоққа аъзо давлатлар потенциал жавоб чоралари устида ишламоқда, жараён Европа Комиссияси томонидан бошқарилади. Унинг сўзларига кўра, ЕИ раҳбарияти режа тузган ва савдо урушида ғалаба қозона олишига тўлиқ ишонмоқда.
2018 йилда Трамп биринчи марта Европа Иттифоқидан пўлат ва алюминийга божларни жорий қилди, бу Европани ҳайратда қолдирди, у вазиятни кескинлаштирмаслик учун вазмин жавоб берди, деб эслатди Политиcо. Ўшанда яқинлашиш ўрнига Трамп босимни кучайтирди ва Европа Иттифоқидан автомобиллар экспортига бож солиш билан таҳдид қилди – кучга кирмаган қарор барибир Брюсселни ҳайратда қолдирди, у республикачининг таъминот занжирларини бузишга ва АҚШнинг энг муҳим иттифоқчилари билан алоқаларни узишга қодирлигига ишонч ҳосил қилди. Кейинчалик Европа Иттифоқи савдони ҳимоя қилишнинг бир нечта воситаларини, шу жумладан иқтисодий мажбурлашга жавоб бериш механизмини қабул қилди.
«Ўтган сафар биз Трамп аслида қанчалик узоққа боришига ишонмаган эдик. Бу сафар тайёргарлик кўриш учун вақтимиз бўлди. Европа сезиларли даражада ўзгарди ва биз ҳаракат қилишга тайёрмиз,» дея ваъда берди дипломатик манба.
Бир нечта суҳбатдошнинг айтишича, Европа Иттифоқи раҳбарлари ишонч ҳосил қилишган: жавоб чоралари қанчалик қаттиқ бўлса, Трамп музокараларга шунчалик тез рози бўлади. эИ жавоб чоралари орқали Қўшма Штатларга шунчалик ноқулайлик туғдиришни мақсад қилганки, Трамп вазиятдан чиқиш йўлини зудлик билан музокаралар олиб боришга ва Европани яхшироқ мавқега соладиган битим тузишга мажбур бўлади.
