Украина тинчлик эвазига ҳудудининг бир қисмини Россияга бериши мумкин
Украина Қуролли Кучларининг собиқ раҳбари, ҳозирда Украинанинг Лондондаги элчиси Валерий Залужний жанговар ҳаракатларни тугатиш учун ҳудудларнинг бир қисми Россияга берилиши мумкинлиги ҳақида гапирди. Мазкур баёнот Украина раҳбариятидаги туб ўзгаришларни кўрсатиши мумкин.
Британиянинг The Daily Telegraph нашрига берган интервьюсида Залужний Киев учун ҳозирги босқичда хавфсизлик масалалари ҳудудий баҳслардан муҳимроқ эканини айтди.
У сабзавот боғини мисол қилиб келтирар экан, шундай деди: “Агар қўшним боғимнинг бир қисмини ўзлаштириб олган бўлса, биз бу масалани ҳал қилишимиз керак. Ҳозир бўлмаса, фарзандларимиз буни қиладилар”.
Залужнийнинг ушбу сўзлари қизғин муҳокамаларга сабаб бўлди. Зеро, аввалроқ Украина президенти Владимир Зеленский барча йўқотилган ҳудудларни қайтариш тинчликка эришишнинг ажралмас шарти эканини таъкидлаган эди. Бу ўтган ҳафта тақдим этилган «ғалаба режаси»да ҳам ёзилган.
Британия нашрининг таъкидлашича, Залужнийнинг баёноти Украина раҳбариятидаги туб ўзгаришларни кўрсатиши мумкин, чунки илгари ҳудудларни имтиёзлар мавзуси тақиқланган эди. Газета журналистлари суҳбатлашган Украина ҳарбий манбалари ҳам можаронинг тезроқ тугатилиши тарафдори эканини билдириб, катта йўқотишлар ва тез ғалаба қозониб бўлмаслигини қайд этишган.
Айни пайтда, Ғарб урушнинг узайиши Россиянинг 2025-2026 йиллардаги позициясини заифлаштириши мумкин, деб ҳисоблайди, аммо украиналиклар учун тинчлик ҳозир муҳимроқ.
2024 йилнинг февралигача Украина Қуролли кучлари бош қўмондони лавозимида ишлаган Залужний президент Зеленский билан келишмовчиликдан сўнг ишдан бўшатилганди. Кейинчалик у Лондонга элчи этиб тайинланди. Ҳозирда Украина Қуролли Кучлари қўмондонлигига Александр Сирский бошчилик қилмоқда.
Россия президенти Владимир Путин июнь ойида тинчлик ўрнатиш учун ўз шартларини қўйганди: барча Украина қўшинларини Москва даъво қилган тўртта ҳудуддан – Донецк, Луганск, Запорожье ва Херсондан олиб чиқиб кетиши керак. Бундан ташқари, у Киевдан НАТОга аъзо бўлмаслик ҳамда нейтрал мақомини сақлаб қолишни талаб қилди.
Зеленский бу талабларни ультиматум деб атади ва унинг Олий Радада тақдим этилган “ғалаба режаси” жанговар ҳаракатларни давом эттириш ҳамда Украинанинг НАТОга киришини ўз ичига олади.
