Украина Сурия билан дипломатик алоқаларни тикламоқчи
Украина президенти Владимир Зеленский Киев Суриядаги янги ҳукумат билан алоқалар ўрнатиш устида ишлаётганини айтди.
“Биз Сурия билан дипломатик муносабатларни ва халқаро ташкилотлардаги ҳамкорликни тиклашга тайёрланяпмиз”, — деди Зеленский.
2022-йил июн ойида Башар Асад режими Украинанинг шарқий Донетск ва Луганск вилоятларида ўзини бўлгинчи деб эълон қилган икки республика мустақиллигини тан олганидан сўнг Украина Дамашқ билан алоқаларини узган эди.
8 декабр куни Асад режими ағдарилди, шундан сўнг Суриянинг собиқ раҳбари иттифоқчи Россияга қочиб кетди.
Айни пайтда Украина қишлоқ хўжалиги вазири Виталий Ковал Украина шарқий Ўртаер денгизидаги мамлакатга аллақачон озиқ-овқат ёрдами жўнатганини айтди ва Киев “узоқ муддатли” ёрдам кўрсатишига ваъда берди.
Ковалнинг сўзларига кўра, буғдой етказиб бериш бир ой давомида 167 мингга яқин одамни озиқлантиради.
«Бугун ҳукумат мулоқоти даражасида биз қўллаб-қувватлаш барқарор ва бир марталик эмас, балки узоқ муддатли ва башорат қилинадиган бўлиши кераклигини аниқ тушунамиз», деди Ковал телевидениега берган интервюсида.
