Хитойликлар Германияда Volkswagen заводларини сотиб олмоқчи
Хитой компаниялари ва расмийлари Германиянинг ёпилиши режалаштирилган автомобил заводларига, айниқса Volkswagen консернига қизиқиш билдирмоқда, деб ёзади Reuters Хитой ҳукумати режаларидан хабардор манбага таяниб.
Германия заводларини сотиб олиш Хитойга немис автомобил саноатида ўз таъсирини кучайтиришга имкон беради. Хитой компаниялари аллақачон немис иқтисодиётининг турли тармоқларига сармоя киритаётган бўлса-да, Германияда автомобил ишлаб чиқариш улар учун янги чегара бўлиб қолмоқда.
Немис автомобил заводларига инвестициялар Хитойнинг сиёсий жиҳатдан энг нозик қадамига айланиши мумкин, деб ёзади Reuters. Узоқ вақт давомида Германиянинг саноат қудрати рамзи бўлган Волксwаген иқтисодий таназзул ва яшил технологияга ўтиш натижасида қийинчиликларга дуч келди. Германияда электр транспорт воситаларини ишлаб чиқариш Хитой компанияларига импорт қилинадиган автомобиллар учун Европа Иттифоқи тарифларидан қочишга ёрдам бериши мумкин, бу уларнинг Европа автомобил ишлаб чиқарувчилари билан рақобатбардошлигини янада кучайтиради.
Volkswagen харажатларни қисқартириш дастури доирасида Дрезден ва Оснабрюкдаги заводларни ёпиш имкониятини кўриб чиқмоқда, аммо Оснабрюкдаги заводни хитойлик харидорга сотишга тайёр. Компания вакили унинг мақсади фирма ва унинг ходимлари манфаатларини ҳисобга оладиган ҳаётий ечим топиш эканлигини тасдиқлади. Шу билан бирга, Хитой компаниялари иш ўринларини кафолатлаш ва ишлаб чиқаришни сақлаб қолишни талаб қилаётган Германия касаба уюшмаларининг муносабатидан хавотирда.
Reuters хабарига кўра, Хитойнинг кўплаб автомобил ишлаб чиқарувчилари Европада завод очишни ўйламоқда. Айримлари аллақачон Венгрия ва Туркия каби арзонроқ мамлакатларда завод қурмоқда.
