Ўзбекистонда «GAB Airlines» авиакомпанияси иш бошлагани рад қилинди
Ижтимоий тармоқларда тарқалган Ўзбекистонда янги «GAB Airlines» авиакомпанияси ташкил этилгани ва Airbus-320 ва Airbus-330 ҳаво кемаларида парвозларни амалга ошириши ҳақидаги хабарларга расмий муносабат билдирилди.
Фуқаро авиацияси агентлиги берган маълумотга кўра, ушба мазмундаги хабарлар ҳақиқатга тўғри келмайди.
Таъкидланишича, фуқаро авиациясида ҳаво кемаларидан фойдаланиш билан боғлиқ бўлган ҳар қандай фаолиятни амалга ошириш учун, Ўзбекистон Республикаси Ҳаво кодекси ва Лицензиялаш, рухсат бериш ва хабардор қилиш тартиб-таомиллари тўғрисида қонун талабларига мувофиқ ҳар қандай юридик шахс «Ўзавиация» агентлигидан белгиланган тартибда ҳаво кемаси эксплуатанти сертификатини олиши шарт.
Фақатгина ҳаво кемаси эксплуатанти сертификатини олгандан кейингина авиакомпания мақомини олиш мумкин ва ҳаво кемаларида ҳаво ташувларини амалга ошириш ҳуқуқига эга бўлади.
«Ўзини «GAB Airlines»авиакомпанияси деб атаётган ташкилот бугунги кунга қадар «Ўзавиация» агентлигига ҳаво кемаси эксплуатанти сертификатини олиш учун ариза ва ҳаво кемасини сотиб олгани ёки ижарага (лизингга) олгани ҳақидаги ҳужжатларни тақдим этмаган», – дейилади расмий ахборотда.
Эслатиб ўтамиз, бир муддат олдин Instagram ижтимоий тармоғида худди шу номда очилган саҳифа эгаси учувчи, борт кузатувчи стюардессалар учун иш ўринларини эълон қилган.
