Трамп аллақачон Путинга учта катта совға берган

Доналд Трамп АҚШнинг амалдаги президенти бўлганига уч ҳафтадан камроқ вақт ўтган бўлса-да, у Владимир Путинга «учта катта совға» беришга улгурди. Бу ҳақда Newsweek нашри хабар бермоқда.

Хусусан, шу ҳафта Трамп Ғазо уруши пайтида ҳарбий жиноятларда айбдор бўлган Исроил бош вазири Бинямин Нетаняхуни ҳибсга олиш тўғрисида ўтган йил охирида халқаро суд идораси томонидан берилган ордер сабабли Халқаро жиноий судга (ХЖС) қарши санкциялар жорий этиш ҳақида фармон чиқарди.

«Бироқ, бу Россия президенти учун ҳам ажойиб совға ҳисобланади, чунки илгари ХЖС босиб олинган ҳудудлардан украиналик болаларни олиб кетишда айбланаётган Путинни ҳибсга олиш учун ордер берганди.

Трамп маъмуриятининг санкциялари Россия президентига бўлган босимни камайтирмоқда. Кремль тарғиботчилари АҚШ янги маъмуриятининг Москва учун фойдали бўлиши мумкинлиги ҳақидаги тахминлар фонида уларнинг риторикаси ва қарорларини маъқулламоқда,» дея ёзади Newsweek.

Москвага иккинчи совға – АҚШ собиқ президенти маъмурияти кўрсатмаси билан рус олигархларининг яширин мол-мулкини излаш билан шуғулланган Адлия вазирлиги қошидаги оператив гуруҳнинг тарқатиб юборилиши. АҚШнинг янги бош прокурори Пем Бонди гуруҳ фаолиятини наркокартелларга қарши курашга йўналтиришни буюрди.

Бондининг яна бир фармойиши федерал ҳуқуқни муҳофаза қилиш органларининг Россия ва Хитой каби бошқа рақибларнинг Америка сиёсатида тартибсизлик уйғотишга қаратилган яширин таъсир кампанияларига қарши курашиш бўйича ҳаракатларини тўхтатиб қўяди.