Германияда Илон Маскка қарши бойкот бошланди
Немислар Илон Маскнинг сиёсий баёнотларига жавобан Tesla автомобилларидан оммавий равишда воз кечмоқда. Euronews’нинг таъкидлашича, компания сотуви Германияда рекорд даражада тез пасаймоқда, мижозлар эса маҳаллий брендлар – Volkswagen, BMW ва Mercedes’га ўтмоқда.
Бойкотнинг сабаби – Маскнинг Германияда ўнг кучларни қўллаб-қувватловчи баёнотлари. 2023 йил ноябрь ойида у ижтимоий тармоқларда мигрантлар гўёки «Eвропа аҳолисини алмаштираётгани» ҳақида ёзган. Бу гаплар мамлакатда кескин норозиликка сабаб бўлди, айниқса, муҳожирларга қарши сиёсати билан танилган «Германия учун муқобил» (AfD) партиясининг ўсиб бораётган машҳурлиги фонида.
2025 йил январь ойида компаниянинг мамлакатдаги сотуви 2024 йилнинг шу даврига нисбатан 77% га камайди. Tesla заводи жойлашган Грунхайдеда ишчилар норозилик намойишлари ўтказмоқда. Улар меҳнат шароитлари ва паст маошдан шикоят қилганида, Маск уларга жавобан касаба уюшмаларини «саратон ўсмаси» деб атади, бу эса норозиликни янада кучайтирди.
Илгари компания «яшил технологиялар»ни ривожлантиргани учун давлат субсидияларини олган бўлса, эндиликда бу имтиёзлар бекор қилиниши мумкин. Ҳукумат Tesla ишлаб чиқаришининг экологик тозалигига шубҳа билан қарамоқда ва Маскни мамлакат жамиятини беқарорлаштиришда айбламоқда.
Германия компаниянинг энг йирик бозорларидан бири эди, аммо ҳозир Tesla’га қарши норозилик Европанинг бошқа давлатларига ҳам тарқалмоқда. Хусусан, Норвегия ва Швеция немислар билан бирдамлик билдириб, Tesla’дан воз кечмоқда.
Февраль ойи охирида Германия канцлери Олаф Шольц CNNга берган интервьюсида Маскнинг ўнг кучларни қўллаб-қувватлашини кескин танқид қилиб, уни «Европа бўйлаб ўнг партиялар фойдасига сиёсатга аралашишда» айблади ва бу ҳолатни «мутлақо жирканч» деб атади.
