ҲАМАС Трампнинг таҳдидларига жавоб қайтарди
ҲАМАС АҚШ президенти Доналд Трампнинг таҳдидларига эътибор бермай, Исроил асирларини озод қилиш борасида фақат келишилган шартларга амал қилишини маълум қилди. Трамп ҳаракатни «дўзах яратиш» билан қўрқитган эди, агар шанбагача қолган исроиллик асирлар озод қилинмаса.
«Трамп шуни ёдда тутиши керакки, мавжуд келишув бор ва унга иккала томон ҳам риоя қилиши керак. Асирларни қайтаришнинг ягона йўли шу», — деди ҲАМАС вакили Сами Абу Зуҳри сешанба куни.
«Таҳдидлар ҳеч қандай натижа бермайди, балки вазиятни янада мураккаблаштиради», — дея қўшимча қилди у.
ҲАМАС шанба куни режалаштирилган уч исроиллик асирни озод қилишни кечиктириш билан таҳдид қилиб, Исроилни сулҳ шартларини бузишда айблади. Жумладан, Исроилнинг вайрон бўлган Ғазо секторига тинч аҳоли учун чодир ва бошпана киритишга рухсат бермаётгани таъкидланди.
19 январдан бери томонлар беш марта маҳбус алмашиш жараёнини ўтказди. Натижада 21 исроиллик асир ва 730 дан ортиқ фаластинлик маҳбус озод қилинди.
Сулҳнинг биринчи босқичи март ойининг бошигача давом этади. Бу босқич доирасида ҲАМАС 33 нафар асирни, Исроил эса деярли 2000 фаластинлик маҳбусни озод қилиши лозим.
Агар томонлар келишувнинг мураккаброқ бўлган иккинчи босқичи бўйича янги битимга эриша олмаса, март ойидан бошлаб ҳарбий ҳаракатлар қайта бошланиши мумкин. Иккинчи босқич барча қолган асирларни озод қилиш ва сулҳни муддатсиз узайтиришни кўзда тутади.
Эслатиб ўтамиз, Халқаро жиноий суд (ХЖС) 2024 йил ноябрь ойида Исроил бош вазири Бинямин Нетаняху ва собиқ мудофаа вазири Ёав Галантга қарши Ғазо секторида уруш жиноятлари ва инсониятга қарши жиноятлар содир этгани учун ҳибсга олиш ордери чиқарган эди.
Ҳозиргача давом этаётган ҳарбий ҳаракатлар натижасида 48 000 дан ортиқ фаластинлик ҳалок бўлган.
