Марказий банк фуқароларга тегишли банк карталари ҳақида юборилаётган SMS хабарлар бўйича тушунтириш берди
Ижтимоий тармоқларда тижорат банклари томонидан фуқароларга тегишли банк карталари ҳақида SMS хабарлар юборилаётгани ҳақида хабарлар тарқалди. Марказий банк ҳолат бўйича изоҳ берди.
Маълум қилинишича, ушбу SMS хабарлар тижорат банклари томонидан Марказий банкнинг тегишли кўрсатмасига мувофиқ фуқароларни уларнинг номига расмийлаштирилган банк карталари тўғрисида хабардор қилиш мақсадида юборилмоқда.
SMS хабарларда келтирилган банк карталари рақамлари ахборот хавфсизлиги ҳамда киберхавфсизлик талабларидан келиб чиқиб, қисман беркитилган тарзда акс эттирилган.
“Фуқаролар SMS хабарларда қайд этилган банк карталари уларнинг номига расмийлаштирилганлиги билан боғлиқ бирор тушунмовчиликлар келиб чиққан тақдирда, хизмат кўрсатувчи тижорат банкига мурожаат қилиб, ҳолатга аниқлик киритишлари ҳамда фойдаланмаётган банк карталарини ёпишлари тавсия этилади”, дейилади хабарда.
Қўшимча қилинишича, анъанавий усулда банк картаси очишдан ташқари фуқаролар номига банк карталари (хусусан, виртуал банк карталари) фирибгарлар томонидан ҳам очилиши мумкин.
Бунда банк мобил иловаларидаги фуқаро шахсий кабинети эгалланиши оқибатида ёки фуқаронинг ўзи банк мобил иловасида рўйхатдан ўтиш орқали расмийлаштирилиши мумкин.
Аввалроқ ўзгалар номига кредит расмийлаштиришга оид фирибгарликлар бир йилда 42 фоизга ошгани ҳақида хабар берилганди.
Ўзбекистонда фирибгарлар томонидан фуқаролар номига онлайн кредит олиш жинояти кўпайгани сабаб 2024 йил 1 ноябрдан 2025 йил 1 апрелгача банкларда онлайн кредит ажратиш бўйича вақтинчалик тартиб йўлга қўйилганди. Марказий банк томонидан тақдим этилган маълумотларга кўра, 2024 йилда фирибгарлик йўли билан фуқаролар номига онлайн кредит ажратиш орқали 463 та ҳолатда қарийб 15 миллиард сўм миқдорда моддий зарар етказилган.
Марказий банк томонидан бир жисмоний шахсга эмиссия қилинадиган карталар сонини битта банкда 5 тагача, барча банкларда 20 тагача чеклаш бўйича вақтинчалик тартиб ишлаб чиқилган.
