Доктор Трамп операция ўтказди. Бемор норози
АҚШ президенти Доналд Трамп Truth Social ижтимоий тармоғида Вашингтон томонидан ишлаб чиқариш ва хавфсизлик учун муҳим бўлган товарлардан ташқари деярли барча импорт маҳсулотларига 10 фоиздан 49 фоизгача янги божлар жорий этилгани ҳақида ёзув қолдирди.
«Операция якунланди! Бемор омон қолди ва соғаймоқда. Башоратларга кўра, бемор илгаригидан ҳам кучлироқ, йирикроқ, яхшироқ ва бардошлироқ бўлиб кетади,» дея ёзган Трамп.
Шу билан бирга, YouGov тадқиқот хизмати ўтказган сўров натижалари шуни кўрсатмоқдаки, АҚШ аҳолисининг ярмидан кўпи янги савдо божларига қарши чиқмоқда.
АҚШ президенти Доналд Трампнинг ташаббусига америкаликларнинг 40 фоизи мутлақо қўшилмаса, мамлакат аҳолисининг яна 11 фоизи уни умуман маъқулламайди. Амалга оширилаётган бож сиёсатини фуқароларнинг 34 фоизи қўллаб-қувватлаган. Яна 15 фоизи эса содир бўлаётган воқеаларга ўз баҳосини беришга қийналмоқда.
Шу билан бирга, америкаликларнинг 67 фоизи ўзлари учун одатий бўлган товарлар нархининг кўтарилишини кутмоқда. Мамлакат аҳолисининг атиги 15 фоизи нархлар аввалги даражада қолишига умид қилса, яна 4 фоизи эса улар пасайишига ишонмоқда.
Шундай вазиятда ҳар бешинчи америкалик ҳозирнинг ўзидаёқ у ёки бу товарларнинг нархи яқин келажакда ошишини кутиб, уларни захира қилиб сотиб олишни бошламоқда. Айни пайтда, мамлакат аҳолисининг 49 фоизи бундай режалар тузмагани, яна 31 фоизи эса ўз хатти-ҳаракатлари йўналишини ҳали аниқламагани маълум бўлди.
