Марин Ле Пен Имомўғлига ҳасад қилмоқда
Акром Имомўғли билан француз сиёсатчиси Марин Ле Пеннинг сиёсий тақдири қизиқ нуқтада кесишди. Марин Ле Пен узоқ муддат давом этган коррупция иши бўйича айбдор деб топилди. У келгуси президентлик сайловида қатнашолмайди.
Акром Имомўғли эса ЖҲПдан президентликка номзод сифатида эълон қилинди, бироқ у айни пайтда коррупция иши туфайли ҳибсда. Агар суд уни айбдор деб топса, президентликка номзод бўлолмайди. Шунингдек, Имомўғлининг дипломи ҳам бекор қилинди. Агар бу қарор суд томонидан бекор қилинмаса, Имомўғли президентликка номзодликка ариза топширолмайди.
ФАВОРИТ ДЕБ КЎРИЛАЁТГАНДИ
Марин Ле Пен – кучайиб келаётган ўнг қанот радикал кучлар етакчиси. У Макрон билан бўлиб ўтган сўнгги президентлик сайловининг иккинчи босқичида кичик фарқда ютқазганди. 2027 йилда президент бўлиши деярли аниқ деб қаралаётганди. Аммо коррупцияда айбдор деб топилгани боис ҳам қамоқ жазосига ҳукм қилинди, ҳам сиёсий тақиққа учради. Бу ҳолатда унинг келгуси сайловларда асосий номзод сифатида кўрилишини бир четга суринг, балки номзод ҳам бўлолмайди.
КАМПАНИЯЛАРИ ФАРҚЛИ
Имомўғли ва Марин Ле Пеннинг сиёсий тақдирларида бир-бири билан кесишмаган нуқта эса улар тўғрисида юритилаётган кампанияларда кўзга ташланади.
Акром Имомўғли Истанбул шаҳар ҳокимлигидаги айрим пулли ишлар туфайли коррупция, пора ва талон-торож қилиш айбловлари билан ҳибсда. Аммо унга сиёсий жабрдийда сифатида қаралмоқда. Энг камида ўз тарафдорларининг кўз ўнгида қаҳрамонга айланиб улгурган.
Марин Ле Пен эса бундай омад кулиб боқмади. Коррупция бўйича жазоси тасдиқланган сиёсатчи сифатида унинг сиёсий келажаги хавф остида. Чунки Францияда собиқ президентлар Жак Ширак ва Николас Саркози ҳам коррупция туфайли қамоқ жазосига ҳукм қилингани учун сиёсий ҳаётлари тугаганди. Шу боисдан Марин Ле Пеннинг Акром Имомўғлини ҳасад билан кузатаётгани аниқ. “Бундай пайтда Туркияда бўлиш керак эди”, деб ичидан ўтказаётганига шубҳам йўқ.
ҚАҲРАМОН БЎЛДИ
Бизда йиллар давомида “Коррупция ва пора айбловлари туфайли Японияда сиёсатчилар харакири қилади, Европада эса истеъфо беради” дейишарди. Аммо гап Акром Имомўғлига келганда, уни қаҳрамон сифатида кўтаришди.
Марин Ле Пен коррупция иши туфайли айбдор деб топилиб, президентликка номзод бўлиши тақиқлангач, французларнинг аҳволига ачиниб кетдим. Бизлар бўлганимизда эди, Эйфел манораси олдида намойиш ўтказишга чақириб, ташкилотларни кўчага чорлар, полицияга кислота отиб, болта кўтариб чиқар, Марин Ле Пенни қаҳрамонга айлантирган бўлардик.
Францияда ҳам “сариқ жилетлилар” бор, аммо ё уларнинг Акром Имомўғлиси йўқ ёки уларга Ўзгур Ўзел етишмаяпти.
БУ ФРАНЦИЯДА БИРИНЧИ МАРТА БЎЛАЁТГАН ҲОДИСА ЭМАС
САРКОЗИ ИШИ
Турк халқига яхши таниш бўлган мағрур француз президентларидан Николас Саркози пора айбловлари билан қийин аҳволга тушиб қолган. Унинг партиясига нисбатан олиб борилган молиявий терговда маълумотни ошкор қилгани учун судьяга пора таклиф қилиш айблови билан қамоқ жазосига ҳукм этилган.
Саркози 2007 йилги сайлов кампаниясида Ливия етакчиси Муаммар Қаддофийдан пул олгани иддао қилинган иш бўйича ҳам судланмоқда ва унга 10 йиллик қамоқ жазоси талаб қилинмоқда.
ШИРАК ҲАМ ҚАМОҚҚА ҲУКМ ҚИЛИНГАНДИ
Жак Ширак Франциянинг энг машҳур ва энг узоқ муддат президентлик қилган шахсларидан бири эди. Париж шаҳар ҳокими бўлган даврида партияси аъзоларига ишламасалар ҳам маош тайинлагани учун айбдор деб топилган. 79 ёшида қамоқ жазосига ҳукм қилинган Ширак бу қарорни хотиржамлик билан қабул қилган.
ИМОМЎҒЛИ ИШИ
Айбсизлик презумпцияси асосий тамойилдир. Акром Имомўғли ва унинг атрофидаги коррупция, пора ва талон-торож қилиш айблови билан судланаётган шахслар бўйича суд қарори кутилиш керак. Бироқ 560 миллиард лиралик йирик коррупция ва пора айблови қўйилган, пул манбалари билан боғлиқ гумон қилинган, 25 та гувоҳ уларга қарши кўрсатма берган ҳолатда Имомўғлининг қаҳрамон қилиб кўрсатилиши ажабланарлидир.
МАРИН ЛЕ ПЕН ҲОДИСАСИ
Французларнинг ақли йўқми ёки бизда бир ғалатилик борми?
Марин Ле Пен ўтган президентлик сайловида кичик фарқ билан ютқазганди. 2027 йилда эса асосий номзод деб қаралаётганди. Аммо у бир неча йил олдин бошланган коррупция суриштируви доирасида Европа Иттифоқи фондларини талон-торож қилишда айбдор деб топилди ва қамоқ жазосига ҳукм қилинди. Шу сабабли келгуси президентлик сайловида қатнашиш имконияти йўқ.
Аммо ҳеч ким “Марин Ле Пендан қўрқишди, унинг президент бўлишини тўхтатиш учун бундай иш қилишди” демаяпти.
Французлар бунинг учун кўчаларга чиқмаяпти, Марин Ле Пен ҳам “Менинг номзодлигимни тўхтатишмоқда, барчангизни кўчаларга чақиряпман” демаяпти.
ИККИ КУЧЛИ ЕТАКЧИ
Икки Германияни бирлаштириб, жаҳон сиёсатида из қолдирган Ҳелмут Коль ва Франциянинг кучли президентларидан Жак Ширак коррупция айбловлари туфайли сиёсий фаолиятини соя остида якунлашган.
Европа президентлари ва бош вазирларининг айримлари ҳали судланмасдан, фақат коррупцияга доир гумонлар туфайли истеъфо беришган.
Қаҳрамондан ўғри чиқиши мумкин, лекин ўғридан қаҳрамон ясашмайди.
Абдулқодир Селви, Туркиянинг “Ҳуррият” нашри журналисти
