7 кунда чиқиб кет! — АҚШ украиналикларга “депортация хатлари” юборди
Украиналиклар АҚШни тарк этиш талаби билан хатлар олди. Трамп жамоаси буни «техник носозлик» деб атади.
Гуманитар дастур асосида АҚШда бўлган бир неча украиналик фуқаро гўёки мақомлари бекор қилингани сабабли етти кун ичида мамлакатни тарк этиш талаби билан электрон хат олишди.
Кейинчалик Reuters агентлиги Доналд Трамп маъмурияти вакилига асосланиб, хабарномалар хатолик туфайли юборилганини маълум қилди.
«Агар сиз дарҳол АҚШ ҳудудини тарк этмасангиз, мажбурий чиқариб юбориш чораларига дучор бўлишингиз мумкин,» – дейилган хатда, унда АҚШ Ички хавфсизлик вазирлиги қабул қилинганларнинг гуманитар мақомини бекор қилгани таъкидланган.
Сўнгра вазирлик расман жўнатма тасодифий бўлганини ва 2022 йилда уруш бошланганидан кейин ишга туширилган украиналикларни гуманитар қабул қилиш дастури давом этаётганини маълум қилди. Дастур ишга туширилганидан бери АҚШда 240 мингга яқин Украина фуқароси вақтинчалик ҳуқуқий мақом олди. Қанча одам нотўғри хабарнома олгани ҳозирча номаълум. Мактублар урушдан қочган украиналикларни ваҳимага солди.
