АҚШда тухум харидорларга 3 донадан сотилмоқда
АҚШда тухум танқислиги юзага келгани сабабли, баъзи савдо дўконларида харидорларга бир сафар учун атиги 3 дона тухум сотилмоқда. Ҳолат, айниқса, Пасха байрами арафасида аҳолининг кундалик эҳтиёжи ва анъанавий маросимларига салбий таъсир кўрсатмоқда.
Маълумотларга кўра, Пасха байрамида одатда болалар ва оилалар тухумларни рангга бўяб байрам қилишади. Бироқ бу йил тухум топиш қийинлашгани сабабли, америкаликлар картошкани бўяб, байрамона муҳитни сақлаб қолишга уринмоқдалар.
Мутахассисларнинг фикрича, танқисликка бир нечта омиллар сабаб бўлмоқда:
– парранда грипи туфайли миллионлаб товуқлар нобуд бўлган;
– озиқ-овқат нархларининг ошиши ва таъминот занжиридаги узилишлар ҳолатни янада оғирлаштирган.
Айни дамда тухум нархлари кескин ошган ва кўплаб ҳудудларда чекловли савдо тизими жорий этилган. Воқеага муносабат билдирган айрим ижтимоий тармоқ фойдаланувчилари эса ҳазил тариқасида «тухум энди ҳашаматли маҳсулотга айланди», дея фикр билдиришмоқда.
