“Тескари Киссинжер” иш бермайдими? Трамп Россияни Хитойдан ажратиб олиш учун Москва билан дўстлашмоқчи
Президент Доналд Трамп Хитой билан яқин иттифоқини узиш учун Россия билан алоқа ўрнатишга ҳаракат қилмоқда, бироқ бундай стратегия муваффақиятсизликка учраши мумкин, деб ёзмоқда The Washington Post газетаси шарҳловчиси Дэвид Игнатиус.
Шарҳловчи президент Трамп қўллай бошлаган тактикани “тескари Киссинжер” дея таърифлайди.
«1970 йилларда ўша пайтдаги АҚШ давлат котиби Генри Киссинжер Вашингтоннинг СССР билан ҳамкорлигига путур етказиш учун Хитой билан алоқаларини ривожлантирганди. Энди эса Трамп худди шу трюкни амалга оширишга ҳаракат қилмоқда, бироқ Россия билан», дейилади нашр хабарларида.
«Доналд Трамп Москвани Украина бўйича тинчлик келишувига шерик қилиш орқали учта таъсир доирасини яратишига ишонади АҚШ, Россия ва Хитой ўртасида мувозанатлаштирувчи куч бўлади», – дея таъкидлайди Игнатиус.
WP экспертининг фикрича, бу ғоя «мутлақо нотўғри», Трамп, шунингдек, Владимир Путин ва Си Жинпин ўртасида қанчалик яқин муносабатлар ўрнатилганига етарлича баҳо бермаяпти.
«Айни пайтда АҚШ Европа ва Осиёдаги иттифоқчиларига катта зарар етказиши мумкин, чунки энди у ерда жойлашган давлатлар Қўшма Штатларнинг Россия ва Хитой ҳокимиятини жиловлаш истагига шубҳа қилмоқда», – дея хулоса қилади шарҳловчи Дэвид Игнатиус ўз мақоласида.
