АҚШ Жанубий Судан фуқароларининг визаларини бекор қилади
The New York Times нашрининг ёзишича, Вашингтон Жанубий Судан фуқароларига берилган барча визаларни бекор қилмоқда, чунки мамлакат муваққат ҳукумати Трамп маъмурияти томонидан депортация қилинган фуқароларини «ўз вақтида» қабул қилишдан бош тортган.
«Давлат департаменти Жанубий Судан фуқароларига берилган барча визаларни бекор қилади ва уларнинг Қўшма Штатларга келишига йўл қўймаслик учун янги визаларни беришни тўхтатади. Жанубий Судан ҳамкорликни тўлиқ тиклаганида биз бу ҳаракатларни қайта кўриб чиқишга тайёрмиз», — дея таъкидлади АҚШ Давлат котиби Марко Рубио.
Бу Трамп маъмуриятининг алоҳида олинган мамлакатнинг барча фуқароларига таъсир кўрсатадиган биринчи қароридир. Январ ойи охирида Трамп Колумбияга ҳам шунга ўхшаш таҳдидлар қилган, бироқ амалий чоралар кўрилмаган эди.
