БМТ Хавфсизлик Кенгаши шошилинч йиғилади
Украина БМТ Хавфсизлик Кенгашининг фавқулодда сессиясини чақириш ташаббуси билан чиқди. Бунга Россиянинг Кривой Рог шаҳрига уюштирган ҳужуми сабаб бўлди. Жума куни содир этилган бу ҳужум натижасида 20 киши, шулардан 9 нафари бола, ҳалок бўлди ва ўнлаб одамлар жароҳат олди.
«Ўтган ҳафта Россиянинг Кривой Рокка баллистик ракета билан амалга оширган ҳужуми тўққизта боланинг ўлимига сабаб бўлди – бу 2022 йилдан буён битта ҳужумда ҳалок бўлган украиналик болаларнинг энг кўп сонидир. Россия оддий турар-жой ҳудудидаги болалар майдонини нишонга олди. Иложи борича кўпроқ қурбонлар бўлиши учун кассетали жанговар қисмдан фойдаланди. Украина Россия жиноятларига эътиборни қаратиш мақсадида БМТ Хавфсизлик кенгашининг шошилинч йиғилиши ва EХҲТнинг Доимий кенгашининг махсус сессиясини чақириш ташаббуси билан чиқди,» дея Украина ташқи ишлар вазири Андрей Сибига ижтимоий тармоқда ёзди.
Унинг айтишича, ҳар иккала йиғилиш ҳам сешанба куни ўтказилади. «Биз қатъий қоралаш ва кескин чоралар кўришга чақирамиз. Россия украиналик болалар ва тинч аҳолига қарши террорни тўхтатиши, Украина аллақачон қабул қилган АҚШнинг тўлиқ ўт очишни тўхтатиш таклифига жавоб бериши ва урушни якунлаши керак,» деб таъкидлайди Сибига.
