Оксфорд коллежи тадбирларида одам бош суягидан ясалган идишдан фойдаланилган
Буюк Британиянинг нуфузли Оксфорд университетига қарашли Worcester коллежи ўнлаб йиллар давомида расмий кечки тадбирларда инсон бош суягидан тайёрланган махсус пиёладан фойдаланган. Бу ҳақда Питт Риверс музейи директори, профессор Ден Хикс ўзининг янги “Ҳар бир ёдгорлик қулади” номли китобида маълум қилди.
Маълум қилинишича, бу ноодатий идиш сайқалланган ва арраланган бош суягидан ясалган бўлиб, унинг четлари ва асоси кумуш билан безатилган. Пиёла 2015 йилгача Worcester коллежида шароб ва шоколад каби маҳсулотларни тортиш учун расмий кечки овқатларда ишлатилган.
Радиокарбон таҳлиллари идиш тахминан 225 йиллик тарихга эга эканлигини кўрсатган. Билвосита далилларга кўра, бош суяк Кариб денгизи оролларидан олиб келинган қулга тегишли бўлиши мумкин. Бироқ, суяк эгасининг аниқ шахси номаълумлигича қолмоқда.
Мазкур ғайриоддий пиёлани коллежга 1946 йилда Жорж Питт-Риверс совға қилган. У фашизм ва евгеникани қўллаб-қувватлаган шахс бўлиб, Иккинчи жаҳон уруши пайтида интернация қилинган. Унинг бобоси — генерал Питт-Риверс эса артефактни 1884 йилда Sotheby’s аукционидан харид қилган. Пиёладаги кумуш белгилар унинг 1838 йилда, қиролича Виктория тахтга чиққан йили ишланганини кўрсатади.
Талабалар ва меҳмонлар норозилигидан сўнг, идиш 2011 йилдан бошлаб камдан-кам қўлланила бошлаган ва охир-оқибат, 2015 йилда бутунлай олиб ташланган. 2019 йилда коллежи расмийлари профессор Ҳиксга унинг тарихини ўрганиш вазифасини юклаган.
Ҳозирда пиёла архивда «эҳтиром билан» сақланмоқда ва кенг жамоатчилик учун ёпиқ.
Маълумот учун Worcester коллежи Оксфорд университетининг 39 та коллежидан бири бўлиб, 1714 йилда ташкил этилган.
