Оқ уй Украина бўйича музокаралардан чиқиши мумкин
АҚШ Президенти Доналд Трамп Украина бўйича давом этаётган музокаралар самара бермаса, Қўшма Штатлар ушбу жараёндан чиқишни кўриб чиқиши мумкинлигини маълум қилди. Унга кўра, келгуси икки ҳафта ичида муҳим келишувга эришилмаса, Вашингтон музокаралардаги иштирокини тўхтатади.
Трамп Россиядан конструктив ёндашув кутаётганини айтиб, Владимир Путин Украинага қарши кенг кўламли ҳужумлардан тийилишга ҳаракат қилади, дея умид билдирди.
“Айни пайтда музокаралар ниҳоятда фаоллашган, яқин кунларда сезиларли силжиш бўлишини кутяпмиз”, деди Трамп. Унинг айтишича, АҚШ Россияга босимни кучайтирган, бироқ ҳар қандай келишув икки томоннинг розилигисиз бўлмайди. Президент бу вазиятни “тангога ўхшайди — бунда икки киши керак”, деган ибора билан ифодалади.
Трамп айниқса Қрим масаласига алоҳида урғу бериб, яриморолнинг яна Украина назоратига қайтиши эҳтимоли паст эканини айтди. Унинг сўзларига кўра, бу ҳудуд деярли қаршиликсиз Россия таркибига ўтган: “Бу ерда ҳатто ўқ узилмади, Киев уни шунчаки топширди”, деди у.
Россияга қарши янги санкциялар бўйича берилган саволларга жавоб бераркан, Трамп бу масалани “камида бир ҳафта ўтгач” муҳокама қилиш мумкинлигини айтди.
Германиянинг Bild нашри эса, Киев АҚШ томонидан кўрсатилаётган ёрдамнинг қисқаришига тайёрланаётганини ёзди. Нашрга кўра, Украина дипломатлари Трамп таклиф этаётган тинчлик шартларини мақбул деб ҳисобламаяпти.
