Қирғизистон Россиянинг С-300 ракета комплексларини олди
Қирғизистон Россиянинг С-300 зенит-ракета комплексларини олди. Бу ҳақда Қирғизистон Республика Хавфсизлик кенгаши котиби Марат Имонқулов “Известия” нашрига берган интервьюсида маълум қилди.
“Бизда Бирлашган ҳаво мудофааси тизими мавжуд. Энди бизга ушбу қўшма тизимнинг элементлари С-300 келди. Улар Қирғизистон ҳудудига аллақачон олиб келинди”, деган Имонқулов.
Хавфсизлик кенгаши котибининг сўзларига кўра, ушбу ракеталар жойлашган мажмуани жорий йилнинг 8 май куни мамлакат пойтахти Бишкекда Иккинчи жаҳон урушидаги ғалабанинг 80 йиллигига бағишланган тадбирда кўриш мумкин.
Олдинроқ, бир қатор оммавий ахборот воситаларида Қирғизистондаги парад машғулотларида айнан С-300ПС ва Тор-М2КМ зенит-ракета тизимлари ва яна Беларусдан олинган ва модернизация қилинган С-125-2БМ ҳаво мудофаа тизимлари кўрсатилиши ҳақида маълумот тарқалган эди.
Маълумот учун, Қирғизистонга С-300 зенит ракета тизимларини етказиб бериш тўғрисидаги келишувга 2021 йилда республика Президенти Садир Жапаровнинг Россияга ташрифи чоғида эришилган. 2023 йил ноябрь ойида Бирлашган минтақавий ҳаво мудофааси тизимини яратиш тўғрисидаги битим кучга кирган. Ҳужжатга кўра, Россия коллектив хавфсизлик зонасида Бирлашган минтақавий ҳаво мудофааси тизими қўшинларининг ҳаракатларини мувофиқлаштиради ва Қирғизистон ушбу ҳаракатларни бошқаради.
