Хитой Ернинг айланишини секинлаштириб, кунларни узайтирди
Хитойда қурилган улкан Уч Дара тўғони сайёрамиз кунларини чўзишга ҳисса қўшди. НАСА олимларининг таъкидлашича, бу иншоот Ернинг айланишини бироз секинлаштирган ва натижада кунлар 0,06 микросекундга узайган.
Тўғон Янтсзи дарёсида жойлашган бўлиб, у 175 метр баландликда 40 куб километр сувни ушлаб туради. Шунча йирик сув массасининг ҳаракати Ернинг ички мувозанатини — масса тақсимоти ва айланиш моментини ўзгартирган.
НАСА геофизиги доктор Бенжамин Фонг Чао буни шундай изоҳлади: “Бу худди фигурали учувчининг қўлларини очганида айланиши секинлашишига ўхшайди”.
Шунингдек, олимлар Ернинг айланиши табиий равишда ҳам секинлашаётганини айтишмоқда. Ой таъсири туфайли бу жараён давом этмоқда: 1,4 миллиард йил аввал бир кун атиги 18 соат бўлган, ҳозир эса кунлар ҳар асрда тахминан 1,8 миллисекундга чўзилмоқда.
НАСА маълумотларига кўра, кунларнинг узайиши тарихда муҳим экологик ўзгаришларга ҳам сабаб бўлган. Узоқроқ кунлар Ер атмосферасининг кислород билан тўлишига ёрдам берган, бу эса фотосинтез ва ҳаёт учун қулай муҳит яратган.
